Hemsereka Pêroyî ya DBPyî Sebahat Tuncela ke 6ê teşrîna peyêna 2016î ra nata Zîndanê Sîlîvrî yê Hûmara 9î de manena, derheqê prosesê Kurdistan û Tirkîya de qisey kerde û vînayîşê xo pare kerde.
Tuncele bale ante şîddetê dewlete û camêrdî ser û wina va: “Vera sîstemê 5 hezar serran yê camêrdî de do seserra 21. biba serra têkoşînê azadîya cinîyan. Cinîya ke seba pawitişê embaza xo vera panzerî de xo kerde sîper, îqtîdarê Tirkîya tersnayo.”Tuncele dîyar kerde ke DBP seba bedilnayîşê sîstemo tekperest têkoşîn dano û wina va. “DBP seba awankerdişê sîstemo alternatîf hewl dano û no hewldayîş zî mîyanê komelî de ca girewto. Program û tuzugê ke hetê DBPyî ra ameyî pêşkêşkerdiş, hetê şarî ra ameyî qebulkerdiş. Cok ra DBP 106 şaredarîyan qezenç kerd û HDP zî 6 mîlyon reyî girewtî. Na rewşe îqtîdaran tersnaya û dewlete agêraya eyaranê fabrîqa. Dewlete vera DBPyî de planê rijnayîşî eşta dewre û polîtîkayê înkar û asîmîlasyonî esas gêna.”
Ê do vînî bikerî
Tuncele va ‘hêrişê ke vera sîyasetê ma de benî, newe nîyî’ û wina domnaye: “Nê polîtîkayî serranê 90î ra nata bêmaben yenî meşnayîş. Seba ke proseso ke hetê Rayberê Şarê Kurd Abdullah Ocalanî ra amebî destpêkerdiş, qedîya şer dest pêkerd û polîtîkayê ke dişmenê kurdan î, erzîyayî dewre. Dima ra şer û pêrodayîşî kirişîyayî bajar û qezayan. Vera israrê dewlete yê şerî de şarê kurd sîyasetê demokratîkî de israr kerd. Zalim û zulmkarî do vînî bikerî.”
Ganî ma gird bikerî
Tuncele qala prosesê kaos û krîzî ra vejîyayîşî zî kerde û wina va: “Kaos û krîzo ke Rojhelato Mîyanên de yeno cuyayîş ra vejîyayîş, tena bi awankerdişê demokrasî mumkin o. Demokrasîyan de nasname, kultur û bawerîyê cîya-cîyayî eşkenî xo îfade bikerî, labelê no proses tam eksê ci yo. Ganî ma cîyayîyanê xo nê, çîyê ke ma de ortax î, înan gird bikerî. Xeta cinîya azade heme tevgerê cinîyanê dinya rê bîyo moralêko gird.”
ŞÛJIN/AMED