ELÎF ÇETÎNER/DÎHABER/STENBOL
Karkerê zîretî ke her serre feqîrî û betalî ver, vera xo danî bajaranê rojawanî rayîran de mirenî. Karkerê ke qezaya Cizîrî ya Şirnexî ra ameyî dewa Parali ya Sakarya de findiqan arê danî zî nê karkeran ra yî.
Karkerî rojane 12 saet xebetîyenî û 55 TL dîyeno înan. Tena hêvîyêka nê karkeran esta, aye zî awanbîyayîşê aştî ya. Babete ser o karkeran qisey kerdî.
Ramazan Danerîyo 20 serreyî va ‘hetêk de zextê leşkerî û sîyasî heto bîn de zî kêmîya karî ver ma kewtî rayîranê koçî’ û wina dewam kerd: “Ma roje de 12 saetan xebetîyenî. Eke Cizîr de kar bibîyêne, ma nêameyênê nê cayan. Seba ke ma feqîr î, mi nêşêna mektebê xo bidomna. Ewro parlamenterê ma tewqîfbîyaye yî, kam hetê ma de bibo, yeno tewqîfkerdiş. Tena xeyalê ma azadî û aştî yî.
Roja ma bi xebate vîyarena
Îdrîs S.yo 17 serreyî zî 2 serrî yo ke karkerîya zîretî keno. Îdrîs vano ‘ma saet 05:30 de dest bi karî kenî û heta şewe xebetîyenî. Mi zaf bêrîya keyeyê xo kerdo. Eke ez mecburê xebetîyayîşî nêbîyêne, mi waştêne ke ez heme cayanê tarîxî yê dinya bigêra. Tena waştişê mi aştî yo.”