Ewro 1ê Êlule Roja Aştîye ya Cîhanî ya. Na roje her serre bi hawayo sîstematîk yena pîrozkerdiş û hetê zaf kesan ra mesajê aştîye yenî dayîş.
Babete ser o Hemserekê HDPyî yê Bajarê Stenbolî Avûkat Cengîz Çîçekî qisey kerd û fikrê aştîye yê Rayberê Şarê Kurdî Abdullah Ocalanî ke eynî wextî de muwekkîlê ci y o, ser o vînayîşê xo ard ziwan.
Avûkat Çîçekî va ‘yê ke heta nika seba aştîye tewr zaf sereyê xo dejnayo û kede dayo muwekkîlê min o’ û wina dewam kerd: “Eke şert û mercê azadîya Rayberê Şarê Kurdî Abdullah Ocalanî bêrî awankerdiş, o wext do şert mercê aştîya ke heta nika nêameya nê erdan zî, do bêra awankerdiş.”
Her di yewbînan ra cîya yî
Çîçekî qiseykerdişê xo de dîyar kerd ke nê erdan de wexto ke qala aştîye yena kerdiş, problemê kurd yeno vîrê merdimî û wina va: “Merkezê heme vatişê ke aştîye ser o yenî vatiş de problemê kurd esto. Bingeyê felsefeya aştîye ya Rayberîye de zî problemê kurd esto. Aştîya ke Birêz Ocalan qala aye keno û aştîya ke îqtîdarî qala ci kenî, eynî nîyî. Sinifê hakimî aştîyêka komelî ra qerfîyaye awan kerdî. Labelê aştîya Ocalanî eksê îqtîdaran de lehê bindestan de ya û seba çareserîya problemê kurdî ya.
Aştî bi waştiş nîna awankerdiş
Çîçekî qiseykerdişê xo de da zanayîş ke aştîye bi waştiş nîna û dewam kerd: “Aştîye ancax bi dayîşê têkoşînî vejîyena orte. Aştîya ke ma wazenî qesran de nê, aştîya ziqaq û taxan a. Eke şima bişînbî her cayê cuye de aştîye awan bikerî, o wext şima eşkenî serbikewî. Eke ma aştîya îqtîdaran sey çareserî bivînî, ma do şaşî bikerî. Mutabakatê Dolmabahçe yê ke awankarê ci Ocalan bî de çîyêko zelal estbî. Aye roje goreyê waştişê înan nêbo zî derheqê problemê kurdî de her di hetî îmze eştî binê peymanêka zaf muhîme. Cok ra ma bawer kenî ke Mutabakatê Dolmabahçe serran ra dima do reyna bierzîyo dewre. Nê semedî ra zaf muhîm o.”
Ocalan mizgînîya aştîye dano
Çîçekî qiseykerdişê xo de bale ant hewldayîşê Ocalanî yê aştîye ser û wina va: “Modelê Xoserîya Demokratîke seba dewlete şansêkî bî. No welat de tena Birêz Ocalan seba aştîye sereyê xo dejneno. No bi hawayo zelal orte de yo. Ma nêyî pawitişnameyê ci de zî vînenî. Raştîya xo de Birêz Ocalan seserra 21. de Rojhelato Mîyanên û dinya de mizgînîya aştîye dano. Birêz Ocalan zaf reyan qala aştîye keno û bi no hawa hewl dano ke vernîya vengkerdişê manaya ci bigîro. Ocalan erj dano aştîye û no wendişêko polîtîk o. Roja ma de tewr zaf îqtîdarî qala aştîye kenî labelê tewr zaf ê bi xo manaya ci veng kenî. Çaresernêkerdişê problemê kurd beno sebeb ke şarê teberê kurdan zî bi hawayo kole bicuyî.”
ANF/STENBOL