ERDAL TOLHILDAN / ANF/BEHDÎNAN
Endama Koordînasyonê KJKyî Besê Erzîncane derheqê çîyanê ke rojeve de yî de qisey kerdî û hişyarîyê muhîmî kerdî. Erzîncane daye zanayene ke rayîro hîrêyino ke Rayberîya ma vano, o tena seba Tirkîya nê, seba şaranê Rojhelatê Mîyanênenî yo zî.
Erzîncane bale ante polîtîkaya dişmenîye ya AKP û MHPyî yê vera Kurdan de ser û wina va: “Çi heyf o ke dewleta Tirkî hêrişê xo yê vera Kurdan de piştîdayîşo tewr girdî PDKyî ra gêno. PDK vano qey eke ey înan rê hetkarîye nêkerê, nêeşkenê payra bimanê. La eke ê goreyê xo têbigêrê belkî hêzê xo hîna xurt kenê. Eke partîya Kurdan yew mebê, pîya tênêgêrê, nêeşkenê ser bikewê. Heta ke PDK tekîlîya xo bi PKKyî aver nêbero û AKPyî ra dûrî nêkewo, nêeşkeno cayê xo bigîro binê temînatî.”
Erzîncane kampanyaya ‘Seba vurîyayîşî û azadîye ti zî werze payan ser’ ya ke rayberîya cinîyan de ameya destpêkerdene zî ercna û wina va: “Vera şer, merg, rijnayîş û qetlîyaman de seba cuyêka alternatîfe ganî têkoşîn hîna xurt bo. Coka nê kampanya zaf muhîm ê. Kerdoxê bingeyênî yê sîyasetê demokratîkî cinî yê. Sîyaseto demokratîko ke Rayberîya ma vano, tewr zaf bi hemleyanê cinîyan yeno pratîkkerdene. Na hemle tena hemleya çalakî, vervejîyayîş, redkerdiş û rexnekerdişî nêya. Heman wextî de hemleya awankerdişî ya. Tevgerê şorişgêran ê dinya vînkerdişo tewr gird tîya de kerd. Rexne kerd, red kerd la herinda ci de alternatîfêk pêşkêş nêkerd. Têkoşînê PKKyî zaf muhîm zemînêk û kîtle vet werte la problemê ma yê resayîşê kîtleyanê hîrayan esto. Ez bawer kena ke hemle na babete de aver şêro û bi meclîs û komînan bireso heme hetan. Cinîyî ganî tena xîtabê tayî hetan nêkerê, goreyê şarî têbigêrê û heme hetan biancê mîyanê hemle û têkoşînî xurt bikerê.”