Parlamenterê HDPyî yê Maçînî muhîmîya yewîya Kurdan ser o qisey kerd û wina va: “Tirkîya wazena qezencanê Kurdan çin bikero. Vera ci de vernîya Kurdan de tena rayîrêk esto, o zî yewîya Kurdan o. Kurdî ancax bi yewîye eşkenî bixelisyî.”
9ê Teşrîna verêne ra nata yo ke artêşa Tirk û çeteyê ci hêrişê Vakur û Rojhelatê Sûrîye kenî û hewl danî ewja dagîr bikerî. Partî û rêxistinê Kurdan dîyar kenî ke ancax bi yewîya neteweyî nê hêrişî eşkenî bêrî vindarnayene.
Parlementerê HDPyî yê Riha Nusrettîn Maçînî dîyar kerd ke Tirkîya wazena qezencanê Kurdan çin bikera û Kurdî ancay yewîya neteweyî eşkenî qezencanê xo bipawî. Maçînî da zanayene ke vernîya Kurdan de tena rayîrêk esto, o zî yewîya neteweyî yo.
Maçînî va ‘Tirkîya seba ke hêrişanê xo meşrû bikero, tayê planan erzena dewre’ û wina dewam kerd: “Rojhelato Mîyanên de şerêk esto û îqtîdarê AKP û MHPyî hewl dano Kurd û Kurdîstanî bigîro kontrolê xo. Amerîka û Rûsya zî herême de seba ke enerjî û petrolî ser o hakim bibî, hewl danî. Reyna herême de OSO û tayê çeteyî bînî estî. No proses wezîfeyêko tarîxî eşt vernîya ma. Na zî yewîya neteweyî ya. Kurdê çar parçeyî heme sey yewbînan fikirîyenî û ganî sîyasetê înan zî bibo yew.”
Beno ke têkilîyê înan bivejyî raşte
Maçînî da zanayene ke hêzê emperyalî ke se serrî verê Kurdan bêstatu verda, nika zî hewl danî herême de tayê çîyan bikerî û wina va: “Kurdan Rojawan û Başûrê Kurdîstanî de têkoşînê girdî dayî û heta nika 20 hezar kesî şehîd bîyî. Tewr peynî bi operasyonêko hempar yê QSD û Amerîka Bexdadî ame kiştene. No zî persê ‘Gelo xebera îstîxbaratê Tirkîya nêyî ra çinêbi?’ ano vîrê merdimî. Beno ke nê rojan de tayê belgeyê ke têkilîyê Tirkîya û çeteyanê cîhadîstan nîşan bidî, bivejyî raşte.”
Do Tirkîya sernêkewo
Maçînî qala muhîmîya yewîya neteweyî ya Kurdan kerde û wina va: “Tirkîya seba ke Kurdan ra tersaye, herêma biewle viraşte. Helbuk hertim cîhadîstan de têkilîye de ya. Ma zanî ke ê kemerê Ereban wazenî awan bikerî. No plan verê ra esto. Verê cû mîyanê her di welatan de dêsî estbî. Nika zî hewl dîyeno herêmêka winasî awan bikerî. Labelê do Tirkîya sernêkewo. Ganî Kurdî vera nînan de yewîya xo awan bikerî. Ganî kongreya bivirazî û dîplomasîya xo hedre bikerî. Seba ke yewîye bêro awankerdene, ganî Kurdî derhal bêrî têhet û hewldayîşan bikerî.”
MA/AMED