11 tepişteyê Girotxaneyê Tîpa E ê Kurkçuler ke heqê xo waştî raştê ceza amey, dima ra zî amey sewqkerden. 11 tepişteyan ra 4ê ci raştê cezayê ragihandinî amey.
Tirkîye de bado ke OHAL ame îlankerdiş ra dima, zextê vera tepişteyan bî vêşî. Tepiştey raştê zextanê fizîkî û psîkolojîk yenê. Nê tepişteyan ra jew zî Dozdar Sûat Şimşek o ke 16'ê Adara 2017’î de ame tepiştiş o. Şimşekî vist vîrî ke ê raştê kerdenanê dûştê mordemî ameyê.
Dozdar Sûat Şimşekî da zanayîş ke muameleyê zey vetişê cilan, her noqte de vetişê postalan, geyrayîş û hûmartişê ser payan ferzê înan beno. Şimşekî dîyar kerd ke înan nê kerdenî qebûl nêkerdo û va, “Bi sebebo ke ma nê kerdenan qebul nêkerd, ma 11 tepişteyê sîyasî sewqê girotxaneyanê Tîpa F yê Kurkçuler bîyê. Ma tîya de zî eştî qowîşê 5 kesan û qowîşê 5 kesan de 11 kesan bica kerdê.
Gardîyanî erzenê qowişan ser
Tepişte Dozdar Sûat Şimşekî da zonayen ke îdareyê girotxane seba 11 kesan 1 bardaxa pet, 4 tebaxî, 2 koçikî dayo û nê detayan da: “Embazê ma yê nêweşê gulçikî esto. Ma waşt ke awa pak bîyarê. La vatî, “hênî ewja de yo, şirê awa hênî bişimê”. Awa hênî leymin bî. Her tim zengilê lezgîn day piro û gardîyanan destûr nêday ke ma bi şew rakewê. 15 gardîyanî pîya bi robocop û copan kewnê ode û wazenê ma bitersnê. La ma pawitişê heqê xo dewam kerd.” Şîmşekî ard ziwan ke verîya çend rojan 4 tepişteyan rê bi îdîayê "slogan berz kerdê", "teşwîqê îsyan kerdê", “Dayê kêberan ro" û "heqaretê polîsan kerdê" cezayê ragihandinî ameyo dayen.
Goreyê vatenanê Şîmşekî 3 roj cezayê hucre û aşmek cezayê ragihandinî dîya tepişteyê binameyê Serhat Yildiz, aşmek cezayê ragihandinî dîya Nusret Tek û Zahir Şen û dima ra cezayê sewqî înan ra birnîya.
EDENE