20 Girotxaneyanê Tirkîye de tepişteyê dawa PKK û PAJK nezdîye di aşmîyo Grevê Veyşanî yê bêdem û bêdorveger de yê. Beno ke her kêlîyekê de xeberê xirabî zindanan ra bîrê. Girotxaneyê Şakran yê Alîagaya Îzmîrî de tepiştey 58 rojîyo grevî de yê.Tepişteyê cinî yê Şakranî bi raya embazanê xo yê ke amey tehlîyekerdiş mektubekê ruşnay. Tepişteyan vistî vîrî ke bêvengî yena maneya qetlîam û vengê wayîrvejyayîşê xoverdayîşê Grevê Veyşanî kerdî. 

Tepişteyan mektube de hayr antî ser şert û mercanê girotxaneyî ser û aşkere kerdî ke Girotxaneyê Şakran açarnîya cayê îşkence û çewisnayîşî. Goreyê zonayîşê tepişteyan dayîkanê 60 serrî ra heta domanê  5 serrî kerdenî açarnîyay yew îşkence û wexto ke canê lejker û polîsan biwazo, erzenê qowişan ser û gardîyanî xo zey qralan vînenê. 

Zey 19ê Kanune eştî qoxişan ser

Goreyê vatişanê tepişteyanê cinî, 8'ê Mijdare de zey operasyonê 19'ê Kanûne polîs û lejkeran eştî qawîşanê înan ser û hewl day provakasyonî vejerê û bi no şiklî zemîne qetlîamî ronê. Bi saya hestîyarîye tepişteyan, na hewldayen veng vejîya, la dima ra eşyayê (pil û purt) tepişteyan amey talankerdiş, dirnayîş û destserkerdiş. Heta nika eşyayê tepişteyan peyser nêamey dayen û a roj ra tepya gardîyanî zey tîmanê taybet erzenê ser qawîşan û her cayî kenê talan. 

‘Eşyayê ma yenê tiritiş’

Mektubî de tepişteyan day zonayen ke eşyayê înan yenê tiritiş û enê  detayî amey dayen: “Hefteyî mîyan de yew di qorî erzenê qawîşanê ma ser û wazenê provakasyonan vejerê. Ma tepişteyê sîyasî û polîtîk ê. Xoverdayîşî ra xeyrî ma rê çîyekê nêmendo. Pêdîyayîşê ma û keyeyanê ma açarnîyayo îşkence. Heqaret û geyrayîşê viranî zîyaretkaranê ma rê ferz kenê. Heqê ma yê kitab û materyalê çapemenî ameyo xespkerdiş. Xo ra no 6 aşmîyo ma kitab nêgirewto.”

‘Verîya ke bibo berey…’

Tepişteyanê cinî day zonayen ke wazenê ser hewadarîya înan qefesekê virazê  û aşkere kerdî ke verîya ke Şakran açarnîyo cayê mezelqaneyan, ganî raya pêroyîn bikewo hereket. Tepişteyan vistî vîrî ke, ê seba cigêrayîşê serbestîya şarekî têkoşîn kerdîye, eştîyayê girotxaneyan. Mektub bi no vengdayîşî qedîya: “Seba ke peynîya no zilmî bîro, seba ke pêrokîn operasyonê qirkerdişî yê ke bi OHALî amey destbi kerdiş biqedîyo, no 50 rojî ra vêşî yo embazê ma kewtî Greva Veyşanî. Verîya ke bibo berey, ganî qîrayîşê zindanan bîro hesnayîş. Heta ke xoverdayîşê înan rê bi xoverdayîş cewab nîro dayîş û vengê înan nîro aşnawitiş, do qetlîam o wext destpa bikero. Wa kes xo vîr ra nêkero ke bêvengî qetlîam o.  


 DÎHABER/ÎZMÎR