Kapasîteya kampa Serekîya Îdarekarê Rewşa Lezgînî û Afetî (AFAD) 27 hezar a, labelê kampe de 40 hezar koçberê sunî yê ke Sûrîye û tirkmenê ke Iraq ra koçî kerdî, ameyî bicakerdiş. Taxa Terolarê Dulkadîroglu ya Gurgumî de Merkezê Ewnayîşî yê Demvîyarte abî û şarê elewî yê ke taxe de cuyenî viraştişê merkezî ra şikin î. Yeno îdîakerdiş ke seba bedilnayîşê demografîya taxe de cayêko winasî ameyo viraştiş. Hemwelatîyê taxe dîyar kerdî ke komêkê erdîşinî dewe de gêrenî û xo ewleyî de hîs nêkenî.
Babete ser o dayîka domanêkî Done Yumluke (50), dayîka 4 domanan Done Goksongure û dayîka 4 domanan Cennet Taşe (70) qisey kerdî.
Yumluke qiseykerdişê xo de wina va: “Seba çareserî ti hewldayîşê dewlete çin a. Ma nêzanê nê kesî kam î û kura ra ameyî. Mîyanê kampe de arazîyê ma estî. Dewa ma ra koçkerdişî dest pêkerdî. Komê erdîşin kampe ra yenê dewe. Nê kesî seba ke ma bişopnî yenê tîya.”
Ma reaksîyon nawt
Goksongure destpêkê qiseykerdişê xo de va ‘dewe de yeno vatiş ke endamê El Nusra û DAIŞî kampe de manenî’ û wina qedênaye: “Nê kesî seba teftîşkerdişê dewe yenê. Beno ke vera ma de hêrişî bivirazîyî. Rayîrê ke şonê kampe ameyî dagîrkerdiş. Qirkerdişê 1978î yê Gurgumî nêameyo vîrkerdiş. Cok ra ma reaksîyon nawit viraştişê kampe. Ma tarîx ra baş zanê ke do netîce senî bibo.”
Taşe zî wina va: “Eke ewro çîyêk nêbo do siba bibo. Bawerîya ma bi nê kesan çin a. Verê ma tena dewa xo de mendêne zerrîya ma rehet bî. Nika ma nêeşkenî ber ra bivejyî teber. Daristanî hetê nê kesan ra ameyî dagîrkerdiş.”
DÎHABER/GURGUM