Emser Serrgêra 3. ya Qetlîyamê Pirsûsî ya. 20ê Temmuza 2014î de bi desan ciwananê sosyalîstan seba ke piştî bidî Şorişê Rojawanî, vera xo daybî Rojawan. Ciwanê sosyalîstî qezaya Pirsûsî ya Riha de raştê hêrişêko bombeyîn ameybî û netîceyê hêrişî de 33 ciwanî merdbîy. 33 ciwanî cayo ke amey qetilkerdiş de, vizêr yad bî.
Seba yadkerdişî merasîmeke virazî, keyeyanê 33 gencan ra pîya, parlamenter û îdarekarê HDP, DBP, endamanê SGDF ra pîya bi desan kesî tewr bî. Merasîm de de AKP rê nêrazîbîyayîş damûsnîya û ame vaten ke kam terorîst o, orte de yo.
Maya Mûrt Yûrtgulî Şemsa Yûrtgulî hêrs û nêrazîbîyayîşê xo bi nê vatenan ard ziwan: “Ma rê vanê şima terorîst î. Eke ma terorîst î, ma bedenê kamcî cinî teşhîr kerd. Ma kamcî domanî qetil kerd. Ma kamcî însanî ganî bi ganî veşna. Kam terorîst o orte de yo.“
Parlementerê HDP Behçet Yildirimî zî vist vîrî ke înan her tim waşt ke ‘hêrîşkar senî ame tîya, bi tenya sereyê xo ame û qetlîam viraşt’ cigêrayîşê ci bîro kerdiş û va, ‘La nayî ra remay û hewl day serê ci binimnê.
Qiseyan de wazîya ke AKP hesabê komkişten bido.
Waşt heyfê xo bigîro
Heto bîn ra Hemsereka Federasyonê Komeleyê Ciwanê Sosyalîstan Ceren Çobane ke derheqê babed de qisey kerde û hayr ant ser serrgêra 3. ya qetlîamê ser.
Hemsereka SGDFyî Çobane qiseykerdişê xo de qala atmosfera sîyasî ya Qetlîyamê Pirsûsî kerde û wina va: “Hukmatê AKPyî ke weçînayîşê 7ê Hezîrane de têkşîyayîşêko gird cuya, heyfê nê têkşîyayîşî ciwanê ke cuya newe gêrayênê ra girewt. Qetlîyamê Pirsûsî destpêkê nê prosesî yo û çîyê ke mîyanê 2 serranê peyênan de ameyî cuyayîş zî dewamê nê prosesî yî. Ciwanan waştênê mabênê xo û şarî de pirdêk awan bikerî û Qetlîyamê Pirsûsî zî no pird hedef girewt. HDP Tirkîya de 7ê Hezîrane de serkewtişêko gird qezenç kerdbî. Şar cuyêka alternatîfe gêrayêne.”
AKP-MÎT-DAIŞ ortax î
Çobane dewamê qiseykerdişê xo de va ‘ciwanî o wext berpirsîyarîyêka girde girewtî milê xo ser û ver bi Rojawanî kewtîy rayîr’ û wina domnaye: “Ma o wext vatbî ‘ma her serre kampê hamnanî awan kenî, labelê emser tarîx ma ra kampê hamnanî nê, newe ra awankerdişê Kobanê wazeno’ û ma kewtbîy rayîr. Qetlîyam de hemkarîya AKP-MÎT-DAIŞî estbîye. Qetlîyamê Pirsûsî destpêkê şerî yo. Eke no qetlîyam nêro roşnkerdiş, do qetlîyamê neweyî bibî. Dima ra Anqara de zî qetlîyam bî. Mabênê serranê 2015 û 2017î de xeylê qetlîyamî ameyî cuyayîş. Keyeyo ke polîtîkaya şerî nêkewt mîyan, nêmend.”
Gonîye têmîyan bîye
Çobane va ‘bi Qetlîyamê Pirsûsî gonîya ciwananê Tirkîya û yê ciwananê Kurdistanî têmîyan bîye’ û wina va: “Bi temîyanbîyayîşê gonîyan şorişêk vejîya orte. Cok ra ganî ma têkoşîno ortax ya ciwananê Tirkîya û yê Kurdistanî awan bikerî. Ewro bi mîlyonan kesî vanî edalet. Lazimîya her kesî bi edaletî esta. Ciwanî seba ke şîyêne hetkarîya merdimê ke raştê zulmî DAIŞî ameyêne, ameyî qetilkerdiş û ma nika seba ê ciwanan edalet wazenî. Ewro waştişê ma yê edaletî bîyo waştişê heme cografyaye.”
Hîna zaf ciwanî şîyî
Çobane peynîya qiseykerdişê xo de va ‘ciwananê Tirkîya fek tepîya game eştişî ra verade, hîna zaf wayîrê Şorişê Rojawanî vejîyayî’ û wina qedênaye: “Dewlete bi nê qetlîyamî waşte têkilîya ciwananê Tirkîya û Şorişê Rojawanî biqerfna. La mîyanê 2 serranê peyênan de hîna zaf ciwananê Tirkîya vera xo dayî Rojawanî. Ma serrgêra Şorişê Rojawanî de şorişî silam kenî. Ma do sey ciwananê Tirkîya hîna zaf wayîrê Şorişê Rojawanî bivejyî.”
RIHA/STENBOL