Înîsiyatîfa Kampanya Azadiya Ocalan ku di 1’ê Gulanê de li Iraq û tevahiya Başûrê Kurdistanê dest bi kampanya îmzeyan a ji bo "Azadiya Ocalan û girtiyên siyasî" kiribû, xampanyaya xwe berdewam dike. Piştî kampanyayê 46 roj li pey xwe hiştin, li gelek deveran ji hejmara kû hatibû armanc kirin zêdetir îmze lê hatine komkirin û niha bi sedhezaran îmze hatin komkirin. Însiyatîfa kampanya îmzeyan ku ji bo Ocalan hatine komkirin diyar kir ku li bajarê Hewlêrê heta niha 144 hezar îmze hatine komkirin. Însiyatîfa ku PÇDK, Hemwelatiyên Azad, RJAK û Ciwanên Welatparêz têde cih digrin saet di 17:30’an de ji bo radestkirina formen îmzeyan çûn serdana navenda Nûnertiya Tevgera Goran ya Bajarvaniya Deşta Hewlêrê. Heyeta înîsiyatifa kampanyayê ku tê de Sozdar Kurdistanî, Şêrzad Hesen, Husên Kerkûkî û Telet Hesen cih digirtin, ji aliyê Berpirsê Nûnertiya Goran Muhendîs Rêbûwar ve hate pêşwazî kirin û keyfxweşiya xwe anî ziman. Piştî ku şanda înîsiyatifa kampanyê û endamên Tevgera Goran li ser mijara kampanyê axivîn, formên îmzeyan yên kampanyayê, jibo kû Tevgera Goran jî beşdarî komkirina îmzeyan bibe radestî nûnerê Tevgera Goran Rêbûwar Muhendis hatin kirin.


Divê hikûmet berpirsyariyan bi cîh bîne
Piştî ku forma kampanyayê ji aliyê Berpirsê Nûnertiya Goran Muhendîs Rêbûwar ve hate îmzekirin ji DÎHA'yê re axivî. Rêbûwar, xebatên birêvebirina kampanya îmzeyan weke erkek netewî û pîroz bilêv kir û wiha got: “Ez vê hewildan û têkoşîna we bi şanazî û keyfxweşî pîroz dikim. Ji ber ku azadiya birêz Ocalan weke ji bo mirovahî û gelê Kurd weke pêwîstiyek dîrokî dibînim. Ji bo azadiya Kurd û Kurdistanê PKK’ê û gelê Kurd bi taybet Kurdên Bakûrê Kurdistanê tişta ket ser milê xwe kirin, lewra niha di çarçoveya pêvajoya çareseriya demokratik ya pirsgirêka Kurd de rêza pêngav avêtinê di destê Hikûmeta AKP’ê û dewleta Tirk de ye.”
Rêbûwar bang li dewleta Tirk, hikûmeta AKP’ê û aliyên peywendîdar kir kû ji bo pêvajoya çareseriya pirsgirêka Kurd ya bi riyên demokratik û aştiyane bi awayekî serkeftî bigehe armanca xwe pêwîste Rêberê Gelê Kurd Abdullah Ocalan azad bibe. Lewra divê hikûmet vê berpirsyariya xwe ya dîrokî bi cîh bîne.  Rêveberê Ciwanên ser Tevgera Goran Aso Silêman jî  wiha got: “Azadiya Rêber Ocalan azadiya tevayî Kurdan e. Bila dev ji me berdin û bila Kurd serokatiya me bikin ne Tirk, Ereb û Faris. Lewra divê birêz Ocalan Azad bibe û erkê xwe yê rêbertiyê di nav gelê xwe de pêk bîne.”

Li Duhokê berdewam dike
Kampanya îmzeyan li gundê Duhokê jî berdewam dike. Li gund û navçeyên Duhokê Akre û Siri bi hezaran îmze hatin komkirin. Li Akre dezgeha îmzeyan a hat vekirin rastî eleqeyek mezin hat. Hezar û 500 îmze hat komkirin. Gelê herêmê û pêşmergeyan eleqeyek mezin nîşanî kampanyayê dan. Endamên Înîsiyatifê diyar kirin ku kampanya rastî eleqeyek mezin tê.

DÎHA/HEWLÊR