Wextê ke, Alî Bulaç yew nuşteyêk nusabi. AKP ra vatênê; “Pêronê cematan û AKP pîya xebat kerdo û bîyê hukmat. Ma seyî pîya bîyê hukmat, gera ma pîya zî biweri”.
Şerê AKP û Fetullahîyan seyî destpêkerd, Alî Bulaç hina nuştibi.
AKP, Alî Bulaç goştarî nêkerd. Va: “Hukmat eza, tîya ra pê ez tena wena”.
Çiqas şi, şerê AKP û Fetullahîyan zêde bi.
Nika zî şerêk mîyanê AKP’yîyan de destpêkerdo.
Şerêk beyntarê R.T.Erdoganî û hukmatî de vejîyayo.
R.T.Erdogan û B.Arinç, B.Arinço M.Gokçek yewbîn ra hina qalan kenî, pêronê şarê Kurdîstan û Anatolîya fekê xo akerdo, temaşa kenî.
Erdogan vano, “Mi ser de yew nêbeno. Gera pêronê çîyan gore mi bibo”. Vano: “Çi pirse Kurd! Çîyo hina çîno. Çi peymane Dolmabaxçe! Ez çîyê hina qebûl nêkena. Eger PKK fek çekan verenêdo,tîya ra pê hina nêşino”
Erdogan û hukmat cewab danê yewbîn.
B.Arinço M.Gokçek cewab danê yewbîn. Arinç, Gokçek ra vano: “Ti kewtê verardê Fetullahîyan. To Enqera lete bi lete rota”
Arteşa Tirk zî vano: “Çi Ruhê Eşme! Ma terorîstan muxatab nêgênî. Ma terorîstan ra şer kenî”.
Çîyo ke, Cemîl Bayik va eynî hina vejîyeno. Cemîl Bayik vatibi ke: “Kamcîn hukmatî pirse Kurdî de gamî nêeştî, o hukmat kewto. AKP û Erdogan zî gaman nêerzenê, aqibetê înan ze hukmatên bîn bo”.
Nika zî hina aseno ke, peynîye AKP û Erdoganê zî ze ANAP, DSP, DYP, M.Yilmaz, B.Ecevît û T.Çîller bo.
AKP wazena qesasê xo şarê kurd ra bigero, la dem zî ze demê ANAP, DSP û DYP nîyo.
AKP û wazena ze na meselaya meşkê bikero.
Mesela meşkê hinawa.
* MEŞKÊ
Ha meşkê, do meşkê.
* Meşkê ma meşkê tûşke
Bêwara qinewişk e.
* Mi şawa, to şawa
Kutka meşke dirnawa.
* Do nan yo, rûn ça wo?
Pisînga rûn remnawo.
* Kutikbabî ez kuwawa
Misasî mi de şiknawa.
Yane AKP wazena ze meselayê meşkê bikero û la ne PKK ne zî şarê kurd no keys nêdanê AKP.
Şarê Kurd sey ne vateyê baw û kalanê xo keno.
“Kutik laweno, karwan luweno”
AKP se kena xa bikero, reyna şarê kurd rayîra xo ya azadî de şino.
Des mîlyon zêdeyîr însan vejîya meydananê Newrozê û netîceyê weçînayîşê 7’ê Hezîran zî seyî bibo, nîşan da.
Kam se vano wa vajo, şarê kurd kewto rayîra xo. Xo dima ra nêewnêno.
Şino û şino.