‘Ti Dejêko Bêwayîr î’ serra 2015 de vejîyayo. No kitab, kitabê Enwerî yo yewin o. Nuştoxî kitabê xo yê diyîn zî dîyayo weşanxaneyî û beno ke mîyanê çend aşman de vîyo.
12 hîkayeyê kilmekî
Kitabê Enwerî ‘Ti Dejêko Bêwayîr î’yo ke 62 rîpel o. Tede 12 hîkayeyê kilmekî yê bi nameyê “Ez xo şirawena surgun”, “Teyfo Hîlebaz”, “Mezelê di kesanê dejayeyan”, “Bêvengîya Dewa Koyan”, “Ti dejêko bêkes î”, “Axayîya Behrî Axayî”, “Kek Şefîq”, “Hêvîya to”, “Dat Meh”, “Eşqê camêrdêk”, “Zingilê asîmîlasyonî cena”, “Vîndîbîyayeyan ra dima” û “Ez ceylan a” estê.
‘Wext sey awa Dîcle bêveng herekîyeno’
Enwer peynîya yew hîkayeyê xo de wina vano: “Yê to zî yew hîkaye bî. Halê xo de, wextê xo de yew hîkaye. Bê to tu kes na hîkaya ra fehm nêkerde. Bê herra to tu kes dejanê to ra fehm nêkerd. Nika ti zî sey herra xo bêkes î. Nika ti zî sey welatê xo xerîb û bêwayîr î. Nika na hîkaye ewnena to ra. Ti na hikayeya xo de yew cumle gêrenî. Her çi sey cumleyanê to nîmcet mend. Na hikaye qederê to kena qederê xo. Hînî wextê bêvengî destpêkerde. La bêvengî zerrîya to de hepis menda.Vengê to sey wextî to zerrîya xo de kişeno. Her çî zerrîya to de ciwiyeno û mireno. Wext sey awa Dîcle bêveng herekîyeno û zerrîya to de hêdî-hêdî xo kişeno. Sey sewdaya welatî û aye xo kişeno. Merg to nêtersneno. Hende bêvengîya zerrîya to, hende bêvengîya aye mergî ra giran a. Bêvengîye hînî bîya qederê to. Ti bêvengîye sey mergî danî xo ra.”
Semedê ziwanê xo wazena destê xo bierzî binê kerra
Enwer kitabê xo de, qismê vateyê nuştoxî de vano “Mi nuştişê nê kitabî de, her cumle de zehmetî anta. Çimkî merdim çîyo ke hem hîs bikero û hem zî binuso xeylê dejanê bêkesan anceno. Mi çîyê ke cuya xo de hîs kerdê nê kitabî de îfade kerdî. Eke cuya mi bes bikera ez hema wazena zaf çîyan binusî. Çi heyf ke çîyê ke mi cuya xo de dîyê û bîya şahîdê înan zafaneyê ci xemgînîye û dejan ra vejîyê orte. Naye ra eke şima nê kitabî biwanê benê xemgîn. Çîyêk nêbeno, xemgînî, keyfweşîya bêmana ra manayin a. Her çî ra ver ez wazena wa feydeyê mi ziwanê mi rê bibo. Ez wazena semedê xelisnayîşê ziwanê xo destê xo bierzî binê kerra. Eke feydeyêkê mi ziwanê mi rê bibo mi rê bes o. Semedê ziwanê ma her xebate û her antişê zehmetî rojêk tutanê ma rê bena roşnîyêk.”
Enwer Yilmaz kam o?
Yilmaz serra 1980 de qezaya Dîyarbekirî Sûr de ameyo dinya. Eslê xo qezaya Çewlîgî Darahênî ra yo. Heta Mektebo Mîyanên mekteb wendo. Cuya xo de zêdeyêr esnafî kerdo. Mabênê serranê 2001 û 2004 de rîwalê fikranê xo hepisxaneyê Dîyarbekerî de mendo. Serranê 2007î ra tepîya eleqeyê xo dayo ziwanî ser. Mîyanê tay xebatanê ziwanî de ca girewto. Gelêk nuşteyê ey rojname û kovaran de vejîyayî. Serra 2011î ra tepîya Televîzyonê GUN TV de bi kirmanckî dest bi karê rojnamegerî kerdo. 5 serran ra dima Televîzyonê JIYAN TV de hewna bi ziwanê xo dest bi xebate kerdo. Serranê 2013-2014 de musabaqaya Huseyîn Çelebî, beşê hîkayeyan de 2 xelatî girewtî. Musabaqaya Musa Anter a Şehîdê Çapamenî de reyêk xelata jurî û reyêk zî xelata teşwîqî girewta.
NAVENDÊ XEBERAN