Pêşangeho ke zereyê hêgayanê şilêran de roniya û motîfê cenî, doman û xoza ca gênê raştê eleqeyê gird yeno. Bi pêşangehî hayr anciyeno weşîya ceniyanê kurd ser.
Hadreyîn bi şiklê îmc bi
Ertûnan û Kiran day zonayen ke no pêşangehê înan netîceyê gureyîn û kedê 6 aşman de vejya werte. Gul Ertûnan ke mamostetî kena, kişta ci de karê resîman ramena. Ertûnan vist vîrî ke him serva antişê resîman û him zî serva pêşangehî cayo tewr rindek Kurdistan o. Ertûnan da zonayen ke, hadreyînê pêşangehî de ronişteyanê taxa Otlû zî paşt dayê û diyar kerd ke, înan jew ca ra yardimê madî nêgiroto, bi ronişteyan ra bi ûsilê îmc pêşangeh hadre kerdiyê.
Gul Ertûnan vist vîrî ke emelê înan no bi ke hayr biancê problemanê ceniyanê kurd ser û wina dewam kerd: “Ma waşt bi quwetê resîman hayr biancê meseleyanê ceniyanê kurd ser. Ma damusnê ke otorîteyê siyasî no heremî aktivîteyanê sosyal û kulturî ra bêpar veradano. Waştena ma ya bîn na bî ke bi wesîleyê pêşangeh heskerdoxê hunerî, çapemenî û siyasetmedarî bîrê linganê dewijan. Cok ra ma waşt ke herkes bîro raştiya nê cenî û qeçikan cayanê ci de bivînê. Herzewbîn ma waşt ke ronişteyê tiya biresnê kultur û sanatî”.
Cenî û xoza girêdayê pê yê
Gul Ertûnan vist vîrî ke serva antişê resîman ê dew bi dew geyriyayê bi ceniyan ra pêdiyayê û nê zonayişan day: “Ma bî şahîdê veyvê qeçekî. Nayî ra ma bi ceniyan ra piya, bebegê ke veyvê qeçekî sîmge kenê viraştî û pêşangehî de nay ro”.
Ertûnan vist vîrî ke cenî feqîrtî, herb, şîdetî tewr vêşî hîs kenê û hayr ant maneyê tilîlî ser: Tilîlî Kurdistan de bi ceniyan ra biya jû. Tilîlî qîrayiş û quwetê ceniyan o. Cenî merdişî de, serkewtiş de, veyveyan de tilîlî ancenê. No hardî de merdiş zî, veyve zî serkewtişî zî kêmî nêbenê. Cok ra tilîlî yê ceniyan zî kêm nêbenê. Ne herb qedîyeno, ne zî feqîrtî. Cok ra tilîlî benê berz. Tilîlî qîrayiş o. Vera sîstemê serdest tilîlî yê ceniyan serwedarnayiş o. Ertûnan da zonayen ke cenî zey xoza ya û aşkere kerd ke cenî, huner û qoza pê ra ciya nêbenê.
DÎHA/RIHA