Ez vateyê ke merdim heywanan ser ra vanê ra aciz a. Ci ra hes nêkena. Mavajîme sey pisinga nankor e, zerenca xayîn e û sn. Ya kî tim vîra mi der o, mamosteyade ma ya tirkî estbîye aye tim nimûne dayênê ma vatenê qijike rê çêlîkê xo sey çêlîkê şahîn o. Ez bawer nêkena qijike nîya fikirîna. Goreyê mi qijike çêlîkê xo qet yew çêlikanê bînan ra muqayese nêkena. La Şengal de meseleya timsahî mi zaf dana fikirîyene. Kanê vanê ya timsah verê çêlîkê xo weno, peye cû ser berbeno. Ez seba tîmsahî mane dana. Bê şik na meseleya tîmsahî bi xozaya tîmsahî ra girêdayî ya. La eke însan hînî bikero merdim senî mane bidêro, çi name pano, ci ra vajo çi?
Meseleya tîmsahî rewşa Şengalî weş dana nasnayene. Hêzên ke îta serwerbî Êzîdî bi destanê xo dayî fekê gonîweranê daîşî nika kî Êzîdîyan rê hîsîran varnenê. Nînan ra yew M. Barzanî yo. Raştî kî tîmsahtîye de pispor o. Şengal de Êzîdî qirkerdîşê fizîkî ra vîyarnayî. Nika kî bi hîsiranê tîmsahî wazeno û cad keno ke Êzidîyan qirkerdîşê kulturî ra bivîyarno. Xo sey milaketa başîye musneno. La binê na başîyede tim û tim uşîra xo kî musneno Êzidîyan. Êzidîyan bi uşîra “Eke şima ne bi mi ra bê do şima vêşan bimanê, şima do geste ra bimirê” tersneno. Nê hêzanê desthiladaran Şengal lito. Çîyê nêverdo. Hetê ekonomî ra Şengal zup û ziwa kerdo. Şarê Şengalî debarîya xo bi eskerîye keno. Şarî rê eskerîye kenê pê pîzeyê xo kenê mird. Pîzeyê domananê xo kenê mird. Eke mebê esker sewbîna karo ke bikerê çîn o.
Bê şik gereke ma tarîxê desthilatdaran rind bizanîme. Desthilatdarî bi rolê xo ra wurzenê ra. Gereke ma rind bizanîme ke desthilatdarî merdim nîyê ê verba merdimîyê yê. Eke ê merdim bê o taw nêbenê desthilatdar. Beno ke dilqê merdim de bê la na nêna maneya ke merdim ê.
Seba naye kî gereke komelê Êzdiyan xo serwext bikero. Hişmendîya xo raver bero. Gereke komel dost û dişmenê xo rind nas bikero. Tarîxê xo rind nas bikero. PDK nêbena dostê Êzdîyan. Hîsîrê ke M. Barzanî varneno hîsîrê tîmsahî yê. Naye ra kî dot nika seba ke Êzidîyan bixapno hîsîra varneno. O zaneno çi keno. O zaneno ke hîsîrê ey zur ê.
Aqlê desthilatdaran o hîsî çîn o. Tenê aqlê înan o analîtîk esto. Eke aqlê înan o hîsî estbo xora ê nêbenê desthilatdar. Gereke xeta erjayanê komînal naye rind bizano û xo goreyê naye rêxistin bikero. Verba desthilatdaran xo ver ro bido. No dem demê xeta erjayanê komînal o. Eke merdimê demokrat, sosyalist, çepgir, cinî çi keso/a ke xo merdim vîneno/a, xo xeta komînal de vîneno/a têbikoşo. O taw do ma serbikewîme.
Rolê PKK Şengal de qasê pawitîşî, rolê xo yo esasî viraştîşê şoreşê komelî yo. Îhtîyacê Komelê Êzidî bi şoreş esto. Bi şoreşê komelî. Desthilatdaran bi komelê Êzidîyan xirab kay kerdo. Desthiladarî komelî musnenê beleşîye. Musnenê rehetîye. Komelî ra vanê ti cayê xo de ronîşê ez cayê to de fikirîna. Bi na tore komelî bê refleksê pawitîşî verdanê. Komelo ke bê refleksê pawitîşî mend ey komelî êdî senî biwazê hînî raye ra benê. Na babete de rejîmê Baas xeylê serkewto. Yo ke mendo kî PDK temam kerdo. Rejîmê Baas Êzidî xo rê kerdê asker, PDK kî kerdê peşmerge. Komelê Êzidiyan o qedîm, o yo ke merheleya neolîtîk xorîn cuyayo ewro zaf xirab binê bandora cinsîyetperestîye de yo. Dej û renco ke Êzidîyan dîyo des qatê ey cinîya Êzidî dîyo, vînena. Cinîya Êzidî binê zulm û zordarîya teber û ya zereyî de bê bîhne menda. Ez nînan taybet seba Êzidîyanê Şengalê vana.
Seba nê çîyê ke mi cor vatî û hîna xeylê çîyanê bînan gereke PKK sey hareketêde şoreşger wezîfeya xo ya şoreşgerî bikero. Êzidîyan rakero ser lingan. Heta ke Êzidîyan xo bi xo, xo raye ra nêberd fek ci ra veramedo.