Hukumato tirk rêxistina terorîste îslamî DAÎŞ rê yardim keno. Adana de TIR ameyî guretene. Tede çekî bî û nî çekî seweta DAÎŞ ruşniyenê Suriye. O waxt ra na het bî zelal ke, dewleta tirkî peyê DAÎŞ dera. Nî rozanê peyenan de kî wezîrê karê teverî yê tirkî Ahmet Davutoglu bi xo kerd eskera. Davutoglu vat: “Beno ke DAÎŞ jê rêxistinade radîkal terorîze biaso, la zerrê a rêxistine de şêligî estê. Erebê sunnî estê, cîddî merhele de tirkmenî estê.” Davutoglu pêro cirm est Iraq û Suriye ser, la DAÎŞ paçkerd. Davutoglu bi nî vatîsan rêxistina terorîsta îslamî DAÎŞ rê wayîr vejîno û rewa vîneno. Hukumatê AKP demê kî onca rêxistina terorîsta îslamî El Nusra rê yardim kerd bî. Eskerawo ke hukumatê AKP teyna seweta sunniyan esto. Mesela bînê kî zelal a: Nî vatîsê Davutoglu misnenê ma ke, karkerê konsolosê tirkî yê Musul, hetê DAÎŞ ra nêamê remnayene, wastena hukumatê tirkî ser, DAÎŞ karkerê konsolosî xorê kerdê meyman. Jû tiyatro kaybeno. Onca bakurê Kurdîstanî de operasyonê arteşa tirkî piya gurenayîsê hukumatê tirk û DAÎŞ anê verê çimanê homete. Waxtoke gerîllayê YPG, HPG û YJA STAR seweta xelesnayena şarê ezîdî şî şengal, eskeriya AKP kî Bakur de dest kerd operasyonan. Yemê Şirnex, Dersîm, Çewlîg, Erzirum û Wan de eskerê dewleta AKP vejayî operasyon. Herema Wan de jû gerîlla hetê eskeranê tirkî û xizmetkaranê înan qorucuyan ra amê kistene. Nî biyayîşî pêro nîsanê piya gurenayîsê hukumatê AKP û DAÎŞ yê. Kurdî gune nî biyayîsan verê çimî de bijerê, stratejiyê xo yê haştiye sero reyna bifikriyê. Operasyonê arteşa AKP osnenê ma ke, AKP raştiye de haştiye nêwazena. Jû hukumatoke çekan dano rêxistina terorîste jê DAÎŞ û rusneno kurdan ser, rojdemê ey de haştiye çîna.
Polîtîka dewleta tirkî yê verva kurdan de qeyta jû vurnayîs çîno. Çiqas ke hen oseno, raştiye de xetê surî yê dewleta tirkî verva kurdan ewro kî devam kenê. Hukumatê AKP mecburî mend, kurdanê Başûr de kewt tekîliye. La ma nika vîneme ke rexistina DAÎŞyake dewleta AKP cirê yardim kena, Başur de çitur erzena heremanê kurdan ser, her keşî ra oseno. Bakur de kî AKP kewte tenge, coka nika demê haştiye ra qesey kena. La, na dem de sene heqê kurdan yenê dayenê, zelal niyê. Jû hukumatoke zonanê ma de perverde nêwazeno, herhal ma de bi haştiye û têdustiye ciwiyayîs kî nêwazeno. Dewleta tirkî niya ra, hukumatê AKP niya ro. La, kurdî onca kî kelekanê xo oncenê lîmananê tirkî. PDK omidê xo Recep Tayyîp Erdogan ra gireda, Iraq û Amerîka guretî verva xo. Amerîka cikewtîsê DAÎŞ yê Musul nêdî, dima kî cikewtîsê DAÎŞ yê Şengal nêdî. No yeno çi mane? Seke polîtîka AKP yê teverî, bi taybetiye yê Rojhilatê Miyanî îflas kerd, polîtîka PDK yê Tirkiye kî hen îflas kerd. Hukumatê AKP axsata kerde, pereyî qezenc kerdî. Bi nî pereyan rêxistina terorîste îslamî jê DAÎŞ kerde weyîye û verdê ra kurdan ser.