Nêvurîna, nêvurîna Tirkîya nêvurîna! Dîna çond reye vurîye, Tirkîya zurê vurnayîşî kerdî, hama nêvurîye.
Serrunê newayî caverdîme, Tirkîya hetê serrunê hewtayî ser sona.
Fetullah Gülen beno Türkeş. Nika qetilkaran keno amade. Serrunê hewtayî de Türkeş honde na cematê Fetullahî fetva kistene nêdenê.
Yê Türkeş çiqa ke wertê polîs û eskeran de mordemê xo bî, dewlete tam era xo dest nêguret bî. Yê Türkeş tetîkçîyê xo gencan û wendekaran ra amenê leto jede. Polîs û eskerî poşt dênê ci.
Na dem de Fetullahî dest de dewlete esta û pêro imkanê dewlete seweta cematî yenê kar. Na hal nîya nêmaneno.
Nejdîde lewê polîs û eskeran de talivê Fetullayî yê sîvîl kî endî çeku cenê xo dest. Nî sîvîlî jê serrunê hewtayî her ca de onca vejînê saydê kurdan, alevîyan û muxalefetê bînî.
Serrunê hewtayî de, eke her tim nêbî, oncakî qetilkarê faşîstî  gegane amenê pêguretene û erjîyenê hepis.
Tabî faşîstan tarva heştay ra bara xo gurete. Dewleta ke nî faşîstî seveknayî bî, tarva heştay de nî guretî zerre, cirê ejat kerd û taye darde kerdî. Faşîstî sas bî û vat ‘ma seweta dewlet û miletê xo kist, na dewlete ça marê nîya kena?’
Na dem ra tepîya faşîstî onca nêvurîyayî, hama jû persnîsane mezgê înan de mende. Na nêna o mane ke MHP endî bîya baqil. Hama dîqat kena endî.
Nika Fettulah û cematê xo zaf zaf bi tehlîkeyê. Çike her çî înan dest dero. Na semed ra wo ke Fettulah Gülen Amerîka ra fetva kistene dano. Nînan çond serrîyo zerrê dewlete de xo rind organîze kerd, maqamê mûhîmî fîştra xo dest. Demê AKaPe de teyna kar bare kerd.
Bingê xo zaf xorî est, nika zaf xorî ra yeno cematê Fetullahî. Mordemeku dest de hem pereyî estê, hem dewlete.
Kamke îkna nêkerd, ey bi peran herînenê cenê lewê xo. Keso ke ne îkna beno, ne kî peru qebul keno, o cerîno zerre û hepisxanan de poynîno.
Roştber û entellektulê Tirkîya leto jede hora jê bukelemun yê. Kam ke bî serdest rengê eyî cenê û cirê xizmete kenê.
Taye roştberan ra kî veng nêvejîno. Mordeman jê Orhan Pamuk xo noro kerrenî. Ça vengê xo nevejîno, verva na faşîzmî jê serrunê neway ça nevejîno, nêzonen.
Mirê hen yeno ke hurêndya ‘ülkücünê’ serrunê hewtayî nika endî talivê Fetullayî cenê. Unîversîtan de û cadan de miletî kisenê.
Nî rozanê peyenan de Fetullah Gülen rengê xo tam kerd eskera. Hometê rê kerd eskera ke, o mordemode dîndar nîyo, nijadperest o û faşîst o.
Tirkîya de hata nika qeyta jû rayverê cematî honde wertê sîyasetî nêkewtî bî û honde eskera fetva kistene nedayî bî.