Kurdistan û Tirkîya de 2 serranê peyênan de vera muxalîfan de xeylê operasyonî virazîyayî û çarçewaya nê operasyonan de bi hezaran merdimî ameyî tepiştiş û tewqîfkerdiş. Her çiqas ke wextê tepiştişî 3 rojî bî, reyna zî bi sebebanê kêfîyan ver, no dem heta bi aşman ame dergkerdiş. Yê ke ameyî tepiştiş yan zî yê ke zîndanî ra ameyî tehlîyekerdiş, seba hemînan zî şertê kontrolo edlî ame ronayîş. Sere de akademîsyen, nuştox, roşnvîr, rojnameger û zaf hetî nika ameyî hepiskerdiş. Babete ser o Parlamentera HDPyî ya Wanî Bedîa Ozgokçeye qisey kerde û bale ante tepiştiş û tewqîfkerdişan ser.Ozgokçeye va ‘bi mekanîzmaya kontrolo edlî hewl danî komelî bigîrî bin kontrolê xo’ û wina dewam kerde: “Serbestîya bikontrol prosesê cezaya ke ameya tesdîqkerdiş de tedbîrêk a. Kontrolo edlî zî tedbîrêk o ke wextê mehkemebîyayîşî de yeno xebetnayîş. Rewşa normale de ganî lehê şexsî de bêrî xebetnayîş, la roja ewro wina nêbeno.”
Zîndano nîmakerde
Ozgokçeye dewamê qiseykerdişê xo de va ‘2 serranê peyênan de bitaybetî îlanbîyayîşê OHALî ra dima xeylê tewqîfkerdişî bîyî’ û wina domnaye: “Tirkîya de nika se ra 90 zîndanan pirr bîyo. No daxî nîşanê ma dano ke Tirkîya de tabloyêka senîn esta. Nika Tirkîya de bi hezaran kesê muxalîfî ke bi platformanê cîya-cîyayan fikranê xo aşkere kenî, raştê tewqîfkerdiş û cezayanê girdan yenî. Tirkîya nika bîya zîndanêko nîmakerde. Yê ke eşkenî tewqîf bikerî, tewqîf kenî, yê bînan zî bi şertê kontrolo edlî serbest verdanî. Bi no hawa wazenî komelî bigîrî bin kontrolê xo. Bi no hawa hewl danî her kesî bêveng bikerî û faalîyetanê eyî asteng bikerî.”
Heqê ti kesî çin o
Ozgokçeye qala operasyonê ke vera sazî û dezgehanê kurdan benî kerde û wina va: “2 serranê peyênan de nizdîyê 11 hezar endamê ma tepişîyayî. 5 hezar endam, îdarekar, şaredar, parlamenter û sewbîna tewqîf bîyî. 5-6 hezar endamê ma yê ke nêameyî tewqîfkerdiş zî bi şertê kontrolo edlî serbest veradîyayî. Îdîanameyî nînî amadekerdiş û cok ra doze zaf dergî ramenî. Tena vatişêk yan zî çalakîyêk daxî seba tewqîfbîyayîşî bes o. Tirkîya de dadgeh îqtîdarî ra cîya nîyo. No welat de heqê ti kesî çin o ke qisey bikero û fikrê xo vajo.”