Endama Komîteya Merkezê PKKyî Dilzar Dîloke qala dewleta Tirkî kerde û wina va: “Tirkîya de heme çî bi destê dewleta kontraye de yenî rayraberdene. Kesî tersenî ke çîyêk bikerî. No merg ra xirabêr o. Ganî her hetê Tirkîya de çalakîyî bibî. Kurdîstan de ganî her kes vera zîhnîyetê qayûmî de bivejîyo.” DENÎZ GAFÛR / ANF / BEHDÎNAN Endama Komîteya Merkezê PKKyî Dilzar Dîloke derheqê dewleta xorî ser o qisey kerd û tespîtê muhîmî kerdî. Dîloke dîyar kerde ke Tirkîya de dewletêka kontraye esta û aqilo ke ewro yeno rayraberdene ê na dewleta kontraye yo. Dîloke daye zanayene ke qirkerdişanê ke bi destê Demîrel, Çîller, Agar û Gureşî Kurdîstan de dest pêkerd, dewleta kontraye aver berd û wina va: “Ewro pîya bi serokkomarî  temsîlkarê heme dezgehan bi nê mantiqê dewleta kontraye  têgêrenê.” Dîloke bale ante firsendê ke hetê Tevgerê Azadîye û Rayberê Şarê Kurdî Abdullah Ocalanî ra dîyaye dewleta tirkî ser û wina va: “Tevgerê Azadîya Kurdîstanî seba ke Tirkîya nê aqilî ra xo bixelisno xeylî firsatî dayê înan. Tewr peynî de vengdayîşê Rayber Apoyî zî nê firsatanê tarîxîyan ra yew bi. La aqilo kontra vernîya naye girewte. Ewro Kurdî yenê înkarkerdene. Heme dezgehê dewlete bi heman mantiqî têgêrenê. Estbîyayîşê xo serê çînkerdişê Kurdan ra pêanê.” Polîtîkaya qirkerdişî dana vînîkerdene Dîloke va ‘vînîkerdişo tewr gird yê Tirkîya heme welat kerdişanê vera Kurdan de normal vîneno’ û wina domnaye: “Şar terseno ke vera naye de bivejîyo. Tirkîya de her roje kuçeyan de merdimî yenê qetilkerdene. Cinîyî yenê kiştene. Domanî raştê tecawuzî yenê. Ê ke heme erjê madî û manevî yê dewlete tirawitî, saltanatê xo domnenê. Dezgehê dewlete ê ke nan nêvînenê kewenê înan dima. Sîyasetê qirkerdişî bîyî normal. Şarê Tirkîya hînî tersî ra çîyêk nêkeno, her çî rê milê xo çewt keno. Nê heme netîceyê dewleta kontraye de vejîyayî werte. No mergêk o. Cuya nebatkî yo. No mergî ra beter o. AKP û MHP aqilê dewleta kontraye bica ano û no Tîrkîya rê dano vînîkerdene.” Ganî vera qayûman de çalakîyê girdî bêrê viraştene Dîloke qiseykerdişê xo de qala çalakîyê ke do bêrî viraştene kerde û wina va: “Ewro bi nameyê demokrasî çalakîyî yenê viraştene. Vera faşîzmî de nê çalakîyî qîm nêkenê. Nê çalakîyan ramot ke yê ke tewrê çalakîyan benê biqerar ê ke wayîrê erjanê xo vejîyenê û şaredarîyanê xo ra ranêverênê. La ganî nê çalakîyî gird bî, kîtlekî bî. Xora muxatabê nê hêrişan HDP yo. Coka ganî ê her hetê Tirkîya de çalakîyan virazê. Kurdîstan de ganî her kes vera zîhnîyetê qayûmî de werzîyo payan ser. Kurdan tena raye nêda. Semedê azadîye ganê xo da. Wext da, emrê xo da, ewladê xo yê tewr erjayeyî sey bedelî dayî. Coka ganî xoverdayîş bêro xurtkerdene. Cinîyê ke tewr zaf raştê hêrişan yenê ganî vernîya nê xoverdayîşî de cayê xo bîgêrê. Bi xurtkerdişê têkoşînî faşîzm do vînî bikero. Hedefê faşîzmî de tena Kurdî çîn ê. Eke faşîzm birijîyo do her kes ser bikewo.”