Îqtîdarî îlankerdişê rewşa OHALî ra dima şerêko taybet îlan kerd. Hepisxaneyî bîyî sey merkezê îşkenceyî. Goreyê zanayîşê ke hepsî bi rayîrê keyeyê xo şirawitî Komeleya Heqê Merdiman (ÎHD) yê Şûbeya Amedî, hepsîyê sîyasî hêrişanê girdan reyde rî bi rî yî. Hepisxaneyan de hêriş, tehdît û îşkence kêmî nêbenî.
Îdarekarê Hepisxaneyê Bandirma destêr nêdanî ke hepsîyî bivejyî hewş û dest ronenî kinc û sewbîna çîyê ke hepsîyan rê yeno şirawitiş ser. Hepsîyî seba ke nê hêrişî bêrî zanayîş, mektuban şirawenî teber labelê mektubê înan nêerşawîyeno. Heme koguşan de kamera ameyo bicakerdiş û destûr nêdanî ke hepsîyî traş bibî. Keyeyê hepsîyan bi hawayo zit yenî sehnayîş.Goreyê zanayîşê cinîyê ke Hepisxaneyê Tarsusî de tewfîqkerde yî; hepsîyî zêdebîyayîşê hûmare ver erd de rakewenî. Roje de 2 rey awe dîyena hepsîyan. Koguş pê sobeyê kolî germ beno, labelê kolîyan zî nêdanî. Îdarekar û leşkerî dest ronenî malzemeyê hepsîyan ser. Cinîyê hepsî seba ke reaksîyon nîşan bidî, qerarê nêvejîyayîşê pêvînayîşan dayî. Îdarekarê Hepisxaneyê Antalya zî hepsî Abdullah Akdogano ke çaqê xo ra birîndar o, nêbenî tedawî û hucre de tena maneno. Hepisxaneyê Tîpa T yê Wanî de zî muameleyo nêbaş û hepsîyan rê tehdîdê ‘şima do tîya ra sax nêvejyî’ yeno kerdiş.
MELEK YUKSEL / ANF / AMED