Tirkîya demêko derg o seba ke hêrişê herêmê Efrîn û Şehba bikero, planan virazena. Seba nêyî hêrêmanê Ezaz, Exterîn, Raî, Cebel Akil, Bab û Mare rê sewqîyato leşkerî kena û bi rojan o vera Efrînî de topan erzena. 2 rojî verê hêrişo ke vera dewa Kefrantonî de bîy û netîceyê hêrişî de 3 kesî merdbîy û 8 kesî zî birîndar bîybî. Babete ser o Hemsereka Kongreya Komelê Demokratîkî (KCD) Leyla Guvene qisey kerde. Guvene va "Heme dinya bi hawayo heyran kurdan ra ewnîyena, labelê Tirkîya bi polîtîkayanê xo vera kurdan de vindena. Rojawan de vera kurdan de nizdîbîyayîşê Tirkîya senîn bibo, vakur de zî nizdîbîyayîşê ci wina yo.”
Tirkîya ders nêgirewta
Guvene dewamê qiseykerdişê xo de va ‘Tirkîyaya ke Kobanê ra ders nêgirewta, amadekarîya hêrişê Efrînî kena’ û wina dewam kerde: “Çira hêriş yeno kerdiş? Nêwazeno ke kantonê Efrîn, Cizîr û Kobanê biresî yewbînan. Tirkîya vana qey wina rehet eşkena bikewa Efrîn. No çîyêko wina rehet nîyo. Kurdî vera dîktatorîya şima de sere nêronenî. Yê ke vanî ma do hêrişê Efrînî bikerî, wa bizanî ke wina rehet nîyo.”
Guvene bale ante netîceyê îxtîmalê hêrişê Efrînî ser û wina va: “Ganî merdim nêvajo îttîfaqê AKP û MHPyî; ganî merdim vajo îttîfaqê Erdogan û Bahçelîyî. Qetlîyamê kurdan de, statuyê kurdan destê înan ra girewtişî de pê kenî. Heta nika Licê, Xerabê Bava, Talatê û zaf cayanê bînan de operasyonî ameyî viraştiş. Nê operasyonan rê nameyê ‘3 hîlalî’ ame dayîş. No îttîfaq sere ra şaş o û no îttîfaq do Efrîn de têk şêro.”
Vera Kurdan awan kerdî
Guvene qiseykerdişê xo de qala îttîfaqo ke AKPyî çeteyan reyde awan kerdo, kerde û wina va: “OSO, El Nusra û sewbîna grûbê çeteyî seba înan zaf muhîm î. Xora Operasyonê Firat Kalkani de vejîya orte ke Tirkîya nêşêna vera DAIŞî de şer bikera. Nê çeteyî heme Tirkîya reyde hereket kenî. Seba şarî çîyêk nêkenî. Tirkîya ra seba nê çeteyan sîleh û piştîdayîşê ekonomîk şîyî. Ewro krîzê Qatarî esto û dore yena Tirkîya. Qasê Qatarî Tirkîya zî piştî dayo DAIŞî. No îttîfaq, îttîfaqêko têk şîyo. No îttîfaq seba ke kurdan tasfîye bikerî, ameyo ronayîş û do no îttîfaq bi tesilî nêreso hedefê xo.”
Guvene vist vîrî ke “Efrîn kantonêkê yê Rojawanî yo û bi bedelanê girdan ameyo qezençkerdiş. Eke Tirkîya reyna zî hêrişê Efrînî bikera, o wext do Tirkîya zî biba Sûrîye. Wa AKP bawerîya xo bi OHAL û KHKyan nîyaro. Ganî bi hawayo lez nê rayîrî ra biagerî.”
Şarê Efrîn tena nîyo
Guvene wina va: “Eke Tirkîya hêrişê Efrînî bikera, do zaîyatêko gird bida. Ganî Tirkîya nêkewa mîyanê Efrînî. Tirkîya bi nameyê ‘Firat Kalkani’ operasyonêk daybî destpêkerdiş. Bi aşman ewja de mende û nêşîna ti netîce bigîra, ser de bi desan leşkerî ci merdî û peynî de agêraye. Eke ti Rojhelato Mîyanên de sîyaset bikerî, ganî ti statuyê şaranê ewja bişinasnî û raştîya ewja bizanî. Rojhelato Mîyanên de tekperestî nêbeno. Her çiqas ke na raştîye orte de ya, Tirkîya vana ‘hema ez bida kurdî ro, se beno wa bibo’. Zîhnîyetêko winasî nêşêno serbikewo. Şarê Efrînî tena nîyo. ”
Seba ke DAIŞ rehet bikero, beno
Guvene çîyê ke Rojawan de qewimîyenî ser de qisey kerde û wina va: “Nika DAIŞ zaf teng bîyo. Hemleya Reqa hemleyêka zaf cîddî bîye. Eke Reqqa destê çeteyan ra bêro girewtiş, o wext do DAIŞ zaf bikewo zehmetî mîyan. Cok ra Tirkîya wazena bi hêrişkerdişê Efrînî, DAIŞî rê war biakera. Nê semedî ra ganî Tirkîya fek nêyî ra vera bida. Heta nika şîma qet dî ke DAIŞî mudaxaleyê hêzê leşkerî yê Tirkîya kerdo. DAIŞ tim vera şaran de qetlîyaman virazeno. ”
Guvene qiseykerdişê xo de dîyar kerde ke heta nika qetlîyamê cîddî virazîyayî, labelê şarê Tirkîya refleksêko gird nîşan nêdayî û va: "Goreyê ma ganî vera hêrişê Efrînî de kurdan ra zêde tirkî reaksîyon nîşan bidî. ”
DÎHABER/AMED
Do Efrîn zî qezenç bikero
Hezê Sûrîyeya Demokratîke (HSD) operasyonê Reqqa de xover danî. Hukmatê AKPyî zî vera xoverdayîşan de amadekarîya hêrişê Efrînî keno. Hukmatê AKPyî kam ca de kurdêk bibo herişê ewja keno û planê neweyan erzeno dewre.Babete ser o Hemserekê Bajarê Mêrsînî yê Partîya Demokratîke ya Şaran (HDP) Mehmet Mîrze Soylemez û Serekê Bajarê Mêrsînî yê Partîya Şorişgeran Sîmon Gozenî qisey kerdî.
Soylemezî wina va: “AKP hêrişê înan keno. AKP seba ke vernîya qezencanê kurdanê Rojawanî bigîro, heme çîyan keno. Şerê Kobanê de AKP û çeteyê DAIŞî pîya hereket kerdî. AKPyî tehemul nêkerd ke kurdî Reqqa de aver şêrî. AKP amadekarîya hêrişanê neweyan keno. Her çiqas ke AKP piştî da DAIŞî, Kobanê de kurdî qezenc kerdî û Efrîn de zî do kurdî ser bikewî. Ma hêrişanê Efrînî sey ke vera Amed de bibo hesibnenî. Ganî kurdî reaksîyon binawnî.”
Hedef qezenc o
Gozenî wina va: “Hêzbîyayîşê kurdan heme dengeyê Rojhelato Mîyanên xira kerd. Cok ra AKP û MHP amadekarîya hêrişê vera Efrînî de kenî. YPG eşkeno Rojhelato Mîyanên azad bikero. Wazenî vernîya qezencanê kurdan bigirî. Senî ke Kobanê xover da Efrîn zî do xover bido û netîceyê xoverdayîşî de qezenç bikero.”
DÎHABER/MERSÎN