Teşebusê derbe ra dima OHAL amebî îlankerdiş û bi Qerarnameyê Hukmê Qanûnî (KHK) bi hezaran neheqîyî ameyî cuyayîş. Her çiqas ke neheqîyê ke OHAL û KHKyan ver virazîyayî rê rayîrê dadgehî padaye bibo zî, Mehkemeya Qanûno Bingeyî (AYM) mecbûr o ke nê neheqîyan bigîro rojeva xo û biewnîyo.
Muracatê ke 15ê Temuze ra ver ameybî kerdiş, hûmara înan nizdîyê 12 hezar bîy, la 15ê Temuze ra nata hûmara muracatan 100 hezaran ra vîyarta. Mîyanê nê muracatan de yê hemserek, parlamenter û hemserekê şaredarîyan zî estî. Mîyanê dosyayê muracatan de netîceyê referandûmî û yê rojnamegerê tewqîfkerde zî estî. Nê muracatan de hema qerar nêameyo dayîş, Serekê AYMyî Zuhtu Aslanî çend rojî verê vatbî ‘ma do 3 qerarê pîvanî aşkere bikerî’. Yeno pawitiş ke AYM do derheqê ‘azadîya xebetîyayîşî’, ‘azadîya fikir û îfadekerdişî’ û ‘babetê tewqîfbîyayîşî’ de qeraran aşkere bikero. Nê 3 dosyayî seba ke fikrê ci zî bêro girewtiş, erşawîyayî Wezîrîya Edaletî rê. Babete ser o Avûkat Ercan Kanarî qisey kerd.
AYM azad nîyo
Avûkat Kanarî va ‘AYM demêko derg o ke herinda qeraranê azadîwaştoxan de, qeraranê tengan gêno’ û wina domna: “AYM qeraranê xo goreyê caardişî dano. AYM vano ke selahîyetê ci yê kontrolkerdişê qeraranê OHALî çin o, la no goreyê şîroveyanê kehenan çep o. Çimkî qerarnameyê OHALî çarçeweya selahîyetê AYMyî de yî û merdim eşkeno tesbît bikero, qerarnameyo ke serranê 90î de ameyo weşênayîş, ka yê OHALî yo an nê. AYM OHALî paweno, çimê xo ci rê gêno û mehkemeyêka azade nîyo.”
Sîcîlê ci pak nîyo
Kanarî bale ant qerarê ke verê cû AYMyî daybî ser û wina domna: “Wexto ke merdim AYMyî ra ewnîyeno, vîneno ke sîcîlê aye pak nîyo. Verê cû xeylê partîyan padayî û no het de qerarê ke girewtî zî nimûneyê ci yî. Ganî demêk ra raver qerarê xo yê pîvanî aşkere bikero. Vatî ke do derheqê tewqîfbîyayîşî de qerarê pîvanî aşkere bikerî. Goreyê mi no zî reaksîyonan ver ame vatiş û çîyêko erey ame vatiş o. Nika çîyo ke AYM ra yeno pawitiş, ganî sey rewşa Balbay û Haberalî de qerarêk bigîro û vernîya tewqîfmendişo dergî bigîro. Ma no het de zaf bihêvî nîyî. Qerarêko negatîf zî vejîyo, seba mi surprîz nêbeno. Xora eke qerar bîyaye nêbo, o wext do dozî şêrî Mehkemeya Heqê Merdiman ya Ewropa (AÎHM) û do Tirkîya ewja de mehkûm biba.”
DÎHABER/STENBOL