Artêşa Sûrîyeya Azade (OSO) ke bin kontrolê Tirkîya de ya, çarçeweya operasyonê ‘Firat Kalkani’ de kewena Cerablus, Ezaz, El Raî û Bab û ê cayan de demografyaya herêman bedilnenî. Ame musayîş ke kadroyê MHP û Ocaxê Ulkucîyan, subayê artêşa tirke û endamê Dîyanetî ê cayan de kombîyayîşanê nimiteyan virazenî.
Nê cayan de ereb û kurdî yenî koçkerdiş, herinda înan de tirkmenê ke Hama, Ozbekistan û Pakistanî ra anî, bica kenî.Ame musayîş ke 2 rojî verê kombîyayîşêk ke nê hetî beşdar bîyî, ameyo viraştiş. Kombîyayîşo ke 2 rojî verê amebî viraştiş û Grûba tirkmene Lîwa Muntasîr Bîlah û Serekê Ocaxê Ulkucîyan Olcay Kilavuz beşdar bîyî de Vakurê Sûrîye de tirkmenî do senî hîna zaf bihêz bibî ser o ameyo vindetiş. Salonê kombîyayîşî de beyraqa tirkan aliqnaye bîya û qerarê ke kombîyayîş de ameyî girewtiş mîyan de dayîşê koçkerdişî yê kurd û ereban zî herême ra esto.
Dîyanet zî ca gêno
Ame musayîş ke temsîlkarê Weqfê Dîyanetî zî beşdarê kombîyayîşî bîyî. Ame musayîş ke kombîyayîş de do tirkmenî senî hîna zaf bêrî aktîfkerdiş ser o planî yenî viraştiş. Seba ke vernîya faalîyetanê Weqfê Dîyanetî bêro akerdiş, akerdişê Camîyê Umer Bîn Hatepî ke Bab de camîyo tewr gird o û netîceyê bombevarnayîşê artêşa tirke de xira bîbî, yeno kerdiş.
Cerablûsijî bihêrs î
Çimeyê herême dîyar kenî ke subayê tirkan bajar de gêrenî û keyeyê ke zaf hîra yî û cayanê stratejîkî veng kenî, ewja de bica benî. A.Kyo cerablusij dîyar keno ke Cerablusijî heme artêşa tirke û OSOyî sey dagîrker vînenî. Vera dewleta tirke de zaf bihêrs î, labelê tersenî.
ERDOGAN ALTAN /DÎHABER/HELEB