Piştîdayîşê madî û lojîstîkî yê DAIŞî ra bigîrî, raşteraşt erşawitişê çeteyan û bin nameyê cîya-cîyayan de awankerdişê grûbê çeteyan û sewbîna dewleta tirk heta nika her tim polîtîkayanê dij kurdan daya meşnayîş.
Dewleta tirk nika bi heme îmkananê xo vera Şorişê Rojawanî de şer kena. Seba nêyî zî her tim Minbic, Bab û Reqa de kayanê lêminan eşte dewre. Nika zî vejîya orte ke vera îdareyê Rojawanî de dewleta Tirk amadekarîyê plananê suîkastan kerdo.
Enqera de dîyar bîyî
Goreyê malumatê ke ANF dano, bin kontrolê Teşkîlatê Îstîxbaratî yê Milî (MÎT) de yew kome ameya awankerdiş. Çarçeweya planî de tay bajaranê Rojawan û Surîyeya Vakurî de hucreyê nimiteyî ameyî awankerdiş. Nê hucreyan de endamê MÎTî ameyî bicakerdiş û nê kesî seba kesê ke Anqara de ameyî dîyarkerdiş suikast bivirazî, amadekarîye kerdî la zafaneya planê nê kesan heta nika veng ameyo vetiş.
Muslim zî hedef de yo
Reyna goreyê malumatî, vera Hemserekê PYDyî Salîh Muslîmo ke Ewropa de yo zî planê hêrişî ameyo kerdiş. Labelê badê ke endamê îstîxbaratî yê 2 dewletan zî hedîseyî ra haydar bîyî, Tirkîya kesê ke seba suîkastî wezîfedar kerdî, peyser antî. Goreyê malumatî nê kesî hetê MÎTî ra ameyî wezîfedarkerdiş, la nê kesî welatîyê Sûrîye û Tirkîya nîyî. Reyna semedo ke plan deşîfre bîyo, derheqê Muslîm de qerarê tewqîfkerdişî ameyo girewtiş.
Nê planan ra ‘Vera DAIŞî de Têkoşînê Koalîsyonê Mîyanneteweyî’ zî haydar bîyo û Enqera aya kerdo. Nê planî hona zî dewre de yî û seba vengvetişê nê planan hewldayîşî estî.
ANF / BRUKSEL