15 serrê îqtîdarê AKPyî de û bitaybetî zî îlanbîyayîşê OHALî ra dima hûmara zîndan û hepsîyan her ke şono zêde bena. Her roje zîndanê neweyî yenî viraştiş û nê zîndanî zî hetê îqtîdarî ra sey sermayegozarî yenî nîşandayîş.
Goreyê îstatîstîkan 2006 de Tirkîya de 254 zîndanî estbî, labelê mîyanê 11 serran de na hûmare bîya 423. Goreyê Mudurîya Pêroyî ya Zîndan û Ceza ya Tirkîya her serre 10-15 zîndanê neweyî yenî viraştiş. Labelê 2016 ke OHAL ame îlankerdiş de 38 zîndanî ameyî viraştiş. Eke zîndanê neweyî temam bibî, hûmara zîndanê ke OHALî ra dima ameyî viraştiş do bibî 60.
Goreyê daneyê ke Wezîrîya Edaletî 15ê Temmuza 2017î ra dima aşkere kerdî, zîndanan de pêro pîya 223 hezar 451 kesî estî. Labelê kapasîteya zîndanan 207 hezar 338 a. Goreyê Mudurîya Pêroyî ya Zîndan û Ceza ya Tirkîya, do 5 serran mîyan de 174 zîndanê bînî zî bêrî viraştiş û kapasîteya zîndanan qasê 100 hezar 182 kesî zêde biba. Yanî 5 serrî dima do hûmara zîndananê Tirkîya bibo 587.
Babete ser o Hetkara Sekreterê Pêroyî ya Komeleya Heqê Merdiman (ÎHD) Necla Şengule û Parlamentera HDPyî ya Êlihî Ayşe Acar Başarane qisey kerdî. Şengule dîyar kerde ke ê nêşenî derheqê şert û merc û kapasîteya zîndanan de melumatî bigîrî û wina va: “Hukmatê AKPyî hewl dano nîmeyê welatî bideko zîndanan.”
Başarane zî va ‘welat bîyo zîndano akerde’ û wina domnaye: “Hukmat akerdişê zîndanan sey mizgînî aşkere keno. Welatê averşîyaye akerdişê mekteb û unîversîteyan sey mizgînî danî, labelê Tirkîya de abîyayîşê zîndanan sey mizgînî dîyeno. Zêdebîyayîşê zîndanan nîşan dano ke do muxalîfan bitepişî. OHALî ver wextê tepiştişî yeno dergkerdiş. Seba ke wazenî muxalefetî bierzî zîndan, wazenî hertim zîndananê neweyan bivirazî.”
DÎREN YURTSEVER /MA/ANQARA