Hetta esil rolê Tirkîye û Îngîlistanî esto. Katircioglu vist vîrî ke, “Tirkîye nêwazena ravêreya xoserîya Moroyan de rolê ci aşkera bibo û wina dewam kerd: “Çike Tirkîye tersena ke, no Kurdistanî rê bibo nimûne. Nika Tirkîye meseleya kurd de zey ke qet tecrubeyê ci çinyo hereket kena, la tecrubeyê Tirkîye zaf o. AKP hewl dana ke mesele binê tesîrê dînî de çareser bikero, la wina nêbeno. Çike kurdî hinî xo şaro kêmar vînenî û destê ci de tifing esto.
Tirkîye bi aşkera çareserî nêwazena. Meydan de, di meseleyê muhîmî estê, yew ziwan, diyin zî rayberîya xoserî. Goreyê mi, nê meseleyî bi rehetî çareser benî. AKP’yij Omer Dînçer’î Meclîsî ra Rayberîya Pêroyî ser vernîyazêk ardbî, hetta no vernîyaz waştişê kurdan ra hîna aver yew vernîyazê xoserî bi, la AKP qet no vernîyazî nêard rojdemê Tirkîye.”
Mase xirab nêbeno
Erol Katircioglu da zonayene ke, nika Tirkîye de zî xorayîrberdişêkî yeno nîqaşkerdiş û aşkere kerd ke, wexto ke merdim waştişê Tevgerê Moro ya xoserî biewnîyo, vîneno ke, kurdan ra hîna herayêr yew xoserî wazenî û wina vat: “Fînak; tenya pawitişê binge û ekonomîya makro rayberîya navende ra veradayî, la babetê hiqûq, perwerde, weşî û birê ekonomîya heremî, heme rayberîya xoserî ra ameyo veradayîş. Nê pêameyîşî ravêreya pêkewtişî de ame hadrekerdiş û nika çekî zî nêameyî veradayîş.
Gerîlayê Moro hona zî qûwetê xo yê bi tifingî pawenî. Yanî sifte veradayîşê çekan çin o. Finak, yew hetê sûkî destê artêşî de yo û lejkeran ma teslîmê destê gerîlayan kerdî. Dem bi dem pêkewtiş beno, la qet masa nêameyo xirapkerdiş. Fîlîpînan de mislimanî zey kurdan yew heremî de cuyenî. Goreyê erjê xo, wazenê taybetîyê xo yê kiltur û sîyasî ser ameyoxê xo înşa bikerî. Hûrdî hereketî zî wayîrê qûwetê tifingî yê. Fîlîpînan de lejê misliman û katolîkan esto û verê no lejî hetanê 600 serrî şino. Zey welatê ma lejê Tirk û Kurdî çin o. Hetta ma de vertaxîya dînî esto. Hetta Davutoglu demo ke şibi Fîlîpînan vat bi ke; ma dê hewna rehet çareser bikerê, çike lejê înan heta 600 serrî verê şino.”