Îdarekarê TEV-DEMî Aldar Xelîl ke derheqê operasyonê Cerablûs yê Tirkîye de qisey kerd aşkere kerd ke operasyonê Cerablûs do Tirkîye  biveşno. Xelîlî şaranê Sûrîye û Tirkîye ra pîya  çormeyanê demokratîk yê dinya ra waşt ke bikewê hereket.

Aldar Xelîl ke derheqê operasyonê Cerablûs yê Tirkîye de ANF rê qisey kerd vist vîrî ke operasyon netîceyê tayî bazarîyan de, bi destûr girotişê Rûsya, Sûrîye û Îran, bi qebûlê Amerîka destpa kerdo. Xelîlî da zonayen ke Tirkîye ke hewl dana adiro ke Sûrîye de wekerd har bikero de, do xo biveşno. 

 Îdarekarê TEV-DEMî Aldar Xelîlî vist vîrî ke badê xelesnayişê Minbicî îlankerdişê Meclîsê Lejkerî yê BABî sînyalê pêresnayişê kantonanê Efrîn û Kobanê da û wina va: “DAIŞ ra xelesnayişê BAB û Cerablûs yeno maneya temamkerdişê Sîstemê Demokratîk yê Sûrîyeya Bakûr. Bi nayî kemerê Ereb ke ser înkarê kurdan ronîyabi do bişikîyaba û sînorê dewleta teror Tirkîye de kemerê demokrasî ronîyabiya. Xelesnayişê Cerablûs do plananê Sûrîye û Rojawa de vetişê kaosî yê Tirkîye veng vetiba.” 


Hedef îxtidar nê, demokrasî ya

Xelîlî da zonayen ke badê serkewtişê Minbic, destpa kerdişê herbê Hesekê vet werte ke qedînayişê DAIŞî ra tenya Tirkîye nê, rejîmê BAAS û Îran zî nêrehatîyê û aşkere kerd ke rexmo ke Tirkîye verîya nika serkêşîya blokê sûnnî kerd, komanê çete yê zey DAIŞ rişt Sûrîye û dişmenî kerd, la Tirkîye û DAIŞ  nê, quwetê demokratîk zey tehdît yenê vînayen. Aldar Xelîlî da zonayen ke hedefê quwetanê demokratîkî îxtidar nê, demokrasî û îdareyê şarî yo.  Îdarekarê TEV-DEMî vist vîrî ke quwetê îxtidar ge-ge danê piro, ge-ge pêkenê. La mînaka Rojawa îspat kerd ke, eke na şar bîro merhaleyekê xo îdarekerdişî ti dewlet û quwetê tarî nêşenê îradeyê ci bişikînê. 


‘Konseptê hemverê kurd de bî jû’ 

Îdarekarê TEV-DEMî Aldar Xelîlî vist vîrî ke herbê Hesekê û uslûbo ke rejîmî û Tirkîye şixulna damûsnayen ke quwetê statukoperestî rixmê pêrokîn dişmenîya pê, çarçoveyê konseptê hemverê kurd de bîyê jû û pîya hereket kenê. Xelîlî hayr ant pêdiyayişê dîplomatîk yê bi Îsraîl, Rûsya, Rejîmê Baas, Îran û Amerîka yê badê hewldayena derbe ya 15ê Temmuze ser û wina dewam kerd: “Vejya teber ke Hesekê de o ke herb keno Îran o. Herzewbîn Rejîma Baas dûştê Şoreşê Rojawa qora ewil êrişê hewayî viraşt. Tewr peynî de bi îstihbaratê Tirkîye Şam de pêdiyayin virazîya û tablo ame fehmkerdiş. Herzewbîn Emerîka zî wextekê derg bêveng mend. No zî damûsneno ke bêxeber nîya.  Wexto ke herbê Hesekê dewam kerd ke Dîlok de DAIŞ teqînayişekê viraşt. AKP-DAIŞ bi na êriş him cewab da deklarasyonê KCK, him kî seba îşgalê Cerablus kerd behane.”


Hedef manîkerdişê statuyê kurdan o

Xelîlî hayr ant operasyonê Tirkîye yê vera Cerablusî ser û da zonayen ke Tirkîye bi xo DAIŞ o û seba manîkerdişê statuyê kurdan Cerablûs de mavêna komanê çete de nobed vûrnîya. Xelîlî vist vîrî ke Rejîmê Baas, Rûsya û Îran bi bazarîyê hetê Tirkîye bêtesîrkerdişê komanê mûxalîfî yê Heleb riza dayê îşgalî û wina va: “Yeno zonayen ke bêîknakerdişê Rûsya rîwalê seheya asmenî Tirkîye nêşkena bikewo Cerablus. Amerîka zî mavêna quwetanê kurd û Tirkîye polîtîkaya” denge esas gêna û goreyê menfeatanê xo nezdî bena. 

Xelîlî vist vîrî ke îtifaqê nikayî yê mavêna quwetanê statukoperest Peymanê Edena yê 1998î ano vîrî û wina dewam kerd: “Badê na peyman Rayverê Şarê Kurd Abdullah Ocalan Sûrîye ra ame vetiş û Komployê Mavênnetewî bi fiîlî destpa kerd. Rolê Amerîka û Rûsya zî tîya de hayr anceno.  PDK zî zey her reynî zey sondwerê dişmenîya kurdan pîyakarîya îşgalkerdoxan keno. La ganî çîyekê nîro vîrkerdiş no yo ke kurdî û şarê heremî wextanê verîn ra jêde bi quwetî yê. Sûrîye û Irak de yê ke dûştê DAIŞ her b kenê û peyser erzenê tenya quwetê kurdan ê.”


Ganî şarî bikewê hereket 

Xelîlî hayr ant xoverdayiş û tekoşînê kurdan ser û da zonayen ke rixmê pêrokîn êrişanê DAIŞ, PDK, Tirkîye û ENKS yê vera Şoreşê Rojawa. Xelîlî vist vîrî ke şarî û quwetê pawitenî Projeya Federalîzma Demokratîk rê  emel kenê û seba nayî gureyînê. Aldar Xelîlî da zonayen ke neyra tepya zî kurdî dê vera êrişan xover bidê û heta bîr ra zî sîstema xo ya demokratîk pratîze bikerê û va: “Tirkîye û rejîm bi êrişanê asmenî nêşkenê vernîya Şoreşa Rojawa bigîrê û îradeyê şarî bişikînê.”

Îdarekarê TEV-DEMî Aldar Xelîlî aşkere kerd ke cayo ke Amerîka û Rûsya ra tewir bîro pawiten ganî pêrokîn çormeyê demokratîk yê dinya bikewê hereket. Xelîlî vist vîrî ke bi êrişan Şoreşa Rojawa û xoverdayişê kurdan nêşikîyeno û va, la nê polîtîkayî dê adirê Sûrîye hona har bikerê û Tirkîye zî do her roja hona jêde açarno Sûrîye.   


 ANF/QAMIŞLO