Hêrîşê hewayî yê dewleta Tirk, şewa 25ê Nîsane, seat 02:00 de hetê 26 teyareyanê şerî yê TSK ra virazîyay.
Hedefê hêrîşan de herêmê Şengal û Rojawa estbî. Nê cayan ra yewe zî mintiqeya Qereçox a. Qereçox nezdîye sûka Dêrik yê Rojawa yo. Verîya bombevornayîşî teyareyanê şer yê Tirk herêma Qereçox, Dêrik, çormeyê ci de, torê ragihandinî bi temamî birna.
Cayê ke hedef amey girewten de Radyoyê Vengê Rojawa û û Radyoyê Çira tv ke Şengal ra weşan keno zî estê. Goreyê zonayîşan gurekaranê Radyoyê Vengê Rojawa ra tayînan netîceyê hêrîşî de weşîya xo kerdî vinî û tayê ci zî bî dirbetin.
Şehît û dirbetinî estê
Heto bîn ra YPG zî bi îzahatekê nuştekî aşkere kerd ke netîceyê hêrîşî de tayî şervanê înan weşîya xo kerdê vinî. Verfekê fermî yê YPG Rêdûr Xelîl aşkere kerd ke 20 şervanê înan şehît kewtê, 18ê ci zî bîye dirbetin. Dirbetinan ra rewşê 3êan giran o.
Hêrîşan de 5 peşmergeyan zî weşîya xo kerd vinî. La PDK bi îzahatê ‘Bi şaşî hedef amey girewten’ pîyakarîya xo ya bi dewleta Tirk îtîraf kerd. Goreyê tayî îdîayan zî kordînatê hêrîşan hetê PDK ameyê dayen.
Muslim: Şarê Kurd qebûl nêkeno
Hemserokê PYD Salih Muslim ke vera hêrîşa hewayî yê teyareyanê TSK ra nêrazîbîyayîş damûsna û quwetanê koalîsyonî ra waşt ke bêveng nêmanê. Muslimî vist vîrî ke na hêrîş seba yardimdayîşê DAIŞ virazîyaya û va, ‘nêşkenê bi nê hêrîşan şarê Kurdistanî bitersînê’. Muslimî aşkere kerd ke şarê kurd do rêjeyeke tewr jorîn de nêrazîbîyayîşanê xo damûsno. Hemserokê PYD waşt ke koalîsyonê hemverê terorî vera nê hêrîşan de bêveng nêmano û kes nê hêrîşan qebûl nêkero.
No mabên de sermîyanê koalîsyonê mavênneteweyî vizêr şî herêma Qereçox de cipersayîşî kerdî.
KCK veng da
Hemserokîna Konseya Rayverîn ê KCK zî bi îzahatekê nuşteyî reaksîyon damûsna. KCK vist vîrî ke hêrîşanê dewleta Tirk, reyna rafîna ver çiman ke, çekê ke roşîyenê Tirkîye seba kamcî emelanê qilêrîn yenê şixulnayen. KCK veng da pêrokîn Kurdistanijan û dostanê ci ke desince werzê ser payan û heta ke dewleta Tirk bîro cezakerdiş, nûmayîşanê xo biramnê.
Partîyanê Başûr yê zey YNK, Goran, Bizutnawaî Îslamî le Kurdistan û Yekgirtuy Îslamî Kurdistan bi îzahatekê ortex hêrîşanê dewleta Tirk şermezar kerd .
Kurdî vejyay meydanan
Hêrîşê hewayî yê dewleta Tirk vizêr Başûr, Rojawa, Bakûrê Kurdistanî û teberê welatî de protesto bî. Sûkanê Almanya Frankfurt, Dresden, Hamburg, Koln, Dortmund, Dusseldorf, Essen, Stuttgart, Celle, Freibûrg, Oldenburg, Hîldesheîm, Hannover, Paytexta Swêd Stockholm, Norweç-Oslo û sûkanê Swîsre Basel û Zurîh ra pîya xêlê cayan de hêrîşê dewleta Tirk amey protestokerdiş.