Nobeta Edalet û Wijdanî yê HDP ke bi slogana ‘Ma nêvinderî, Vajî Bivindere, Ma dê Faşîzmî Bivindarnî’ Parka Ekîn Ceren yê Amedî de viraşt, vizêr roja 7îne de bi îzahatêko çapemenî qedîya. Nobeta Edalet û Wijdanî nika dewrê Stenbol bî û do ewro  Parka Yogûrtçû yê Stenbolî de dewam bikero. Stenbol ra dima zî do Wan û Îzmîr de biramo. 

Verfekê HDP Osman Baydemîrî îzahatê çapemenî de qisey kerd û kesê ke desteg day nobetî, parlamenter, sîyasetmedar, hemşaredarê tepişteyî selamî kerd. 


‘Erdogan ti çima şarî ra tersenê?’

Baydemîrî da zanayîş ke abluqa û barîyerê polîsan ya çormeyê Nobeta Edalet û Wijdanî de roj bi roj bî vêşî û wina va: “La rixmê abluqa paştîdayîş û wayîrvejyayîş zî bi vêşî. Destûr nêday ke şar û wekîlî bîrê têhet. Sûka ke se ra 70 vengê HDP vejyay ra vanê sûka ma ya. La her çî qedexe kerdî. Her çî girotî bin abluqa. Ma Erdoganî rê pers kenê, ‘Ti çima şarî ra tersenê?’ Ma dê her tim tiya de bê. Ma serbestîya şarî wazenê. Her netew wazena bi ziwan, kamî û kulturê xo biciwîyo. La faşîzm wazeno bi ters û tehdîdan na rastî çinî bikero. Ewro nobeta ma girotê bin abluqa û polîs teberê sûkî ra ardê. No damûsneno ke faşîzmî vinî kerdo.”


Ma şima îqaz kenê 

Baydemîrî da zanayîş ke heta 6 rojan Hemserokanê KCD nêgirotî zerreyê parqa nobetî. Hinî vejyayo teber ke şima no welatî de aştî nêwazenê. Bi sebebo ke aştî aver nêşiro şima tecrîd kerd xorî.”

Osman Baydemîrî bi nê vatenan veng da AKP: "Ey AKP, şima verê xo çarna polîtikayanê şer û şima vinî kerd. Şima îradeyê şarî vist zîndanan. Ey Erdogan û ey hukmat, milet verê xo da ma. Bi tang, top û tifingan, bi zorî nêbeno. Kesê ke waştî paştî bidê ma, şima girotî bin çiman. Ma şima îqaz kenê û vanê fek nê polîtîkayan  ra veradê. 

 

Rêze yê Stenbolî ya 

Baydemîrî da zanayîş ke meclîs û edalet bîyê zey noterê îqtîdarî û vist vîrî ke bi rêziknameyê peynî hinî qiseyê wekîlan zî ame qedexekerdiş. 

Verfekê HDP Osman Baydemîrî aşkere kerd ke Nobeta Edalet û Wijdanî nêqedîyena, Stenbol de ramena û qiseyanê xo wina domna: “Çalakîyê ma do pel be pel girdêr bibê û bibê vila.  Ey Erdogan; Demîrtaş, Yuksekdag û HDP rakîbê to yê sîyasî yê. Ti huqûqa dişmenîye vera înan de ferz kenê. Derbe ser nêkewt. La nika ti bi xo derbe virazenê. Hinî meşrûyetê to çin o. Niyade (biewnî) halê welatî. Tirkîya bi sebebê polîtîkayanê to yê şaşî nale nale. Sirf seba ke kurdî nêbê wayîrê statu, to bi DAİŞ, El Nusra ra ortaxî kerd.”

Baydemîrî peynî de hayr ant çalakîya grevê veyşanî yê Nurîye Gulmen û Semîh Ozakça ser û vist vîrî ke hurdî raştê mudaxale ameyê. Baydemîrî waşt ke hurdî ca de serbest bîrê veradayen û waştenê ci bîrê qebulkerdiş. 

Îzahat û nobet bi çepik û siloganan qedîya.    


 DÎHABER/AMED