Wusênê GESTEMERDE
To xêr ama Can TV, to xêr ama! Seke şima kî zanenê Can TV aşma Gulane de uydî ser o dest bi weşanê xo kerd. Nayê ser o ez kî vana wa Can TV qomê ma re bi xêr û bi emro derg bo. Berêne ma kî Can TV re çim bîme, goş bîme, dest bîme, veng bîme, doş bîme, can û canan bîme, ke wa Can TV kî veng bido vengê ma, reng bido rengê ma, rayê bido raya ma, dest bido destê ma û doş bido doşê ma, ke ma kî verba zulmê zulumkaran de televîzyonê xo re, qomê xo re wayîr vejîme.
Qet bêguman bîr û bawerîya mi awa ke Can TV qomê ma re beno veng, beno reng û beno can. Yanê Can TV vengê mazluman o, vengê bêkesan o, vengê bêvengan o. No husus de bêguman kes re vatena mi çîn a. La teyna ju vatena mi esta a, a kî dişmenê man ê xayin re wa. Dişmen o xayin êdî ê to bes o! Destê xo pîsîrê miletê ma ra, destê xo dêzge û komelanê ma ra, destê xo zonê ma ra, bawerîya ma ra ravir de. No zulmê to, no hukmê to êdî bes o, bes o, bes o!
Seke êno zanitene hukumatê AKP bi OHALî veng û vac re mazluman birnay bî. Bi raya OHALî vengê ma û televîzîyonê ma TV 10, ÎMC TV, Hayatin Sesî, JIYAN TV, Azadî TV… û xêyle rojnameyî û kovarî kerdî kîp. Nê zulmkarî bi naye kî nêvinetî heto bîn ra kî xêle kesî û kedkarê TV 10î guretî zere û hona kî no zulm berdewam keno.
Hondawo ke ma bêveng vinderîme, zulmê nê zulumkaran kî ma ser o honde zêde berdewam keno. Bêveng vinetene merdena ma wa. Qomê man o hêca û delal, berenê ma kî vengê xo re, rengê xo re, çimê xo re, goşê xo re û Can TV yê xo re can û canan bîme û re ci wayîr vejîme!
Ewro êdî rind-xirab bi vengê ma û bi rengê ma ju televîzyonê ma esto. Ma kî gere desteg biderîme nê televîzyonî ke wa xebera ma jumînî ra û bîyayîşanê dinya ra xeberdar bîme. Bi na raye vengê xo biresnîme qomê xo. Bi na rayê qomê xo ra, welatê xo ra benîme xeberdar.
Kam o ke seba Can TV xizmete û fedakarîye keno, ez nê kedkaran û fedakaran pêroyîne fîraz kena û înan re na raya rinde de serkewtene wazena.
Can TV, vengê ma wo, rengê ma wo, canê ma wo…