Dewleta Tirk û hukmata ci ya nikayî seba qirkerdişê xozaya Dersim her çî visto dewre. Bi operasyonanê leşkerî, bi HES û awbendan, bi veşnayîşê birran roj bi roj xoza hona jêde xeripnenê. Nika kî Pilûr de bi TOKÎyan her ca kenê beton. Welatijan nayî rê reaksîyon damûsnay û nayî zey îşgalkerdişê xoza hesibnay.
Cinîyan ra Hurîye Aldogan ke serra 1989 de koçê Stenbolî kerdo da zanayîş, ke wexto ke dewlete dewa înan veşna şert û mercê cuyayîşî Dersimî de nêmende û no sebep ra koçê Stenbolî kerdî. Aldogan vist vîrî ke dewlete nêverdena ke merdimî şirê Dersim û wina va: “Şertî zehmet ê. La seba ameyîşî ma yenê. Eke ma nêrê do Dersimî pêroyî de biqedînê.”
Dersim bîyo beton
Aldogan da zanayîş ke ê wazenê merdimî tîya bi ca bibê û qiseyanê xo bi nê vatenan qedêna: “Hurendîya TOKÎyan de wa merdimî tîya de bi ca bibê. Dersim bîyo beton û ney zî aysîyayîşê bajarî xira kerdo. Ma projeyê TOKî yê Pilûrî negatîf vînenê. Her ke şêro do dewan û xoza heme bikerê beton. Wa her kes serê ersaya xo de keye virazno. Serê erazîyê xezîne de viraştişê keyeyan yeno manaya îşgalkerdişê xoza.”
ŞÛJIN/DERSIM