Seke şima zanî wextêko HDP vatinî barajê weçînayîşî wedarîn Tayîp Erdoxanî vatêne “Eke qewetê şima esto bi partî dekewîn weçînayîş û baraj bivîyarnîn!” Labelê cigeyrayîşanê reyapêroyî dima vejîya orte ke HDP barajî vîyarnena. Û o wext ra dima AKP hêdî hêdî dest bi tehdît û şantajî kerd. Verêcû “Gobelsê AKP” Yalçin Akdoxanî dest pêkerd û vat ke HDP bê qerarê Ocalanî dekewena weçînayîş. Dima zî dîktatorê înan vat ke 400 parlementeran bidinî wa na mesela asanî reyde halî bibo.
Heme partîyê sîyasî semedê weçînayîşan awan benî. Labelê AKP bê mantiq bê fikirîyayîş seke HDP giredayeyê înan a dest bi rexneyan kerd. Û xora zaf derg nêkerd cayê rexneyan na raye tehdît û şantajî girewt. Verêcû înan bi şerî HDP tehdît kerde. Û naye ra pey waşt ke Agirî de bi yew provakasyonî dest bi şerî bikerî la şarê Agirîyî bi fedakarîye û bi ganê xo dayîşî verenîya provaksyonî girewt. Na game ra pey bina kontrol ra vejîyayî û Akdoxanî verê vat HDP eke HDP binê barajî de bimano “super” beno. Dima vat eke Hdp baraj vîyarno prosesê çarekerdişê orte de nêmaneno.
Bi nê şeklî ma weçînayîşê 7ê Hezîrane vîyarnayî labelê tehdîtê AKP kêmî nêbîyî, hîna zêde bîyî. Hema 8ê Hezîrane de Akdoxanî na rey vat ke “Hdp na deqa ra pey tenya şêna fîlmê prosesê çarekerdişî bianco!” Şima zanê xo ra na qale ra pey zî Amed de yew terafdarê Huda-Par ame kiştiş û dima 4 welatperwerî bi destê Hîzbulkontra ameyî kiştiş. Ê rojan de herkesî vat ke meseleya ke munferîd a. Labelê nika vejîya orte ke AKP eşkera dest bi şer û provakasyonî a roje kerdo.
Teqîyayîşê Surucî ra pey xora şima zanî dewlete bi heme qewetê xo, bi bombakerdiş, operasyonanê eskerî, polîsî heriş ser kurdan kerd. Goreyê raporanê dezgeyanê sivîlan no mabên de 63 hemwelatîyê sivîlî bi destê polîsan ameyî kiştiş, nêzdîya 100 hemwelatî zî darbice bîyî. Cayanê sey Cîzîr, Nisêbîn, Sur, Sîlvan, Gever,Şirnex, Çolemerg de bi tank û topan operasyonî ameyî viraştiş. AKP hendî tehdît ra vejîyabî û dest bi qetilkerdişî kerdbi.
Labelê ma nê operasyonan de çîyêko newe zî dîy; Ford Ranger! Goreyê îstatîstîkanê dewlete verê weçînayîşê 7ê Hezîrane 159 Rangerî ameyî herînayîş û heme şawîyayî Kurdistan. Kurdistan de her qetilkerdişî ra pey ma cayê qetilkerdişî de nê erebeyî dîy. Verêcû zaf bala însanan nêantînî labelê nika ma vînenê ke AKP Jîtem o newe awan kerdo û sey serranê 90an dest bi înfazan bîyo.
Verê Gimgim de gerîlaya HPG Ekîn Van ameyî kiştiş û bedenê aye yo zit ame teşhîr kerdiş. Dima ra Şirnex de Haci Lokman Bîrlîk darbice peyê yew erebeyê polîsan dima ame xijkerdiş û verê neweşxaneyî de heta hetê ey bi nê erebayan ame girewtiş û lingê xo ameyî bedenê ey sernayîş. Û nê rojan de Sur de nê tîmanê Jîtemî operasyon viraşt û dêsanê banan ser o “Tîmê Esedullahî” nuşt.
Xora hereketê kurdan çend aşmî yo vatinî Erdoxanî Gladyoyê Saraye awan kerdo. Û roja çarşeme serekwezîrê Tirkîya Davutoglî mîtînga AKP ya Vanî de belkî bizanayîş belkî zî bêzanayîş îtîraf kerd û vat ke eke ma îqtîdar ra bikewî “Torosê Sipî” yenî! Seba îqtîdarî eşkera heme kurdî tehdît kerdî. Labelê her çîy ra teber heme rîyê xo yo faşîst bi eşkera vet orte û serranê wehşetî yê dewlete reyna ardî ma heme kurdan vîre.
Ma a roje teslîmê zîhnîyetê Torosê Sipî nêbîyî û ewro zî teslîmê zîhnîyetê Rangeran nêbenî! 1ê Kanûne ra pey do şima zî zîhnîyetê şima zî bi destê kurdan nê ardî ser ra vîndî bibo ...