Totalîterîzm an zî bi nameyê bîn dîktatorî yeno manaya kesekî an zî komikekî her tewir hêz û îmkan destê xo de bitepişo û bi no awayî ser komelî de bandura xo awan biko.
Waştişê Erdoganî ya pergalê serektî zî nêyî ra sey finak merdim eşkeno bido. Yanî pergalekî ke kes an zî sınıfa elîtî xo sey wayîrê komelî biveyno û her çî komelî bido kerdiş o. Îdare û dîktatorîyê inasar serdemê dîrokî ya cîya cîya de bîyî û nika zî bi maskeyê cîya bîyîşê xo danî domnayîş. Taybetî zî pergalê feodal û kolekarî de dîktatorê inasar bîyî cuye, bi xo xo sey homayê ser erdî îlan kerdî. Pergalê ke panc hezar serre ya ke xo domneno, eslê xo de xo dewletkerdişê dîktatorîyan o.
Dijî nêy pergalan her tim xoverdayîş bîyo
Pergalê kolekar, feodal û kapîtalîstî pergalê ke her awayî dej û ezîyet komelî ra danî cuyayîş î. Nêy pergalan de wina bîyo ke komel nîno naskerdiş, kes zî ameyo qedyayîşî ver. Yanî wina bîyo ke her awayî lêminî sey teşeya cuyayîşî ameyo kerdiş û komel heta qirika xo ameyo lêminkerdiş.
Merdimahî ver bi îflasî ra ameyo kaşkerdiş. Hemverê nêy pergalan dem û mekanê cîya cîya de xoverdayîş ameyî nîşandayîş û hîna zî nêy xoverdayîşî domyenî. Totalîterîzm hîna zaf zî pergalê kolekar û feodalî de bi awayo xorî ameyo cuyayîş. Averşîyayîşê endustrîye, ronesans û roşnvîrî lehê komelî de tay qezencî dayo kerdiş. Labelê pergalo totalîter bi awayo cîya cîya xo newe kerdo û bi cîlakerdiş mîyanê xo de bandura xo domnayo.
Pergalê kolekar û feodalî de îdare bi destê kesekî, pergalo kapîtalîst ke verdewamê pergalê feodal û kolekarî yo û bi endustrî ra dima dekewno merîyet de zî bandure bi destê sinifa elîtî yeno meşnayîş. Yanî beyntarê pergalê kolekar û feodal û pergalo kapîtalîstî de cewherê xo de cîyayîyekî çin o. Nînan ra her yew bi şert û mercê cîya cîya de xodayîşê teberî yo.
Partîyê sîyasîye seba xo û pergalê xo xebitnenî
Qezencê ke bi destê endustrîye ameyî destvistiş, bandora pergalo totalîterî tay sivik kerdo, la nêşînayo werte ra wedarno. Bi têkoşînê sinifa kedkar a ke welatê Ewropaye de virazya, pergal neçar mendo ke tay averşîyayîşê demokratîk qebul bikero.
Pergalê kapîtalîstî de partîyê sîyasî hâletê komelî ke nêbî nêbenî nîyî, la totalîterîzm û kapîtalîzm nêy haletan bi awayo bandorker xebetnenî. Yanî rojê ma yê eyroyên de her welatî de bîyîşê zaf partîyan nîno manaya nêy welatan de demokrasî estbo û şar îradeya xo bikirêşo siyaset û cuyayîşî.
Çimkî pergalê totaliter rojê ma yê eyroyên de hîna zaf bi partîyê sîyasî eşkeno pergalê xo ra gonîya teze bikirêşo; no semedî ra zî her tim wazeno ke wa partîyê sîyasî bibî û panc serran ra yew ray zî weçînayîş bêro kerdiş. Çimkî bi no hawa şarî ra vanî: “Bewnênê şima bi xo îdarekerê xo weçînenî, no semedî ra şima bi xo, xo îdare kenî. Coka no pergal pergalê şima yo, no pergalî bipawênê.”
Merdimî zî demo ke derge ya ke taybetî zî Tirkîyaye çi heyf ke bin bandorê nînan de manenî. Kurdî bi têkoşînê çewres serre şînay bine bandorê nê zîhnîyetê totalîterî ra bivejyî.
Rojê ma de hema hema her welatî de partîyê sîyasîye estî la no nêro famkerdiş ke nê partîyê îradeyê şarî pawiyenî ya zî temsîl kenî. Çimkî pergalê totalîter rojê ma de partîyê sîyasîye seba xo û pergalê xo xebitnenî...
Komunalîzm peynîbîyîşê dîktatorî ya
Roja ma ya eyroyên de zî totalîterîzm taybetî cayo ke kapîtalîzm tede aver nêşîyo yan zî çewt aver şîyo de awayo wişk yeno meşnayîş.
Panjehrê totalîterîzmî cayo ke şar xo rayîra beno yo, yanî komunalîzm o.
Tay qalemşorê kapîtalîstî estî ke komunalîzmî sey rejîma yew partî û yew merdimî vînenî. Helbuk komunalîzm peynîbîyîşê dîktatorî û totalîterîzmî yo. Tam çepê ci pergalê ke panc hezar serre ya ke bi sinif ya dîktatorî û totalîterîzm o.
Sinifeke sermayeye ya wirdêlek ke ser heme şarî bandorê xo keno bi xo dîktatorî mîyanê xo de hewêneno.
Çimkî pergalê sermayeye qet tena bi yew partiye nêşkeno xo ser ningan bigîro. Dîktatorî û kapîtalîzm bi hâletê kultir, lejker û sîyasî bandura xo keno.