Hêzê Kede û Demokrasî yê Dêrsimî vera qerarê tabelaya Şaredarîya Dêrsimî de eşkerayî da çapemenîye. Temsîlkarê rêxistinanê sivîlan û xeylê welatîyî beşdarê eşkerayî bîyî.
Hemserekê HDPyî yê Dêrsimî Hidir Çîçekî reaksîyon nîşan da û wina va: “No waştiş, waştişê heme dêrsimijan o. No şerê Dêrsim û Tuncelî yo. Ma nameyê Tuncelî qebul nêkenî. Çimkî Tuncelî nameyê tecawuz, qirkerdiş, înkar û sewbîna yo. Tuncelî qetilbîyayîşê merdimanê bêguneyan o.”
Dima ra Serekê EMEPî yê Dêrsimî Ergîn Tekînî va ‘qeraro ke hetê endamanê meclîsî ra ame girewtene, newe nîyo’ û wina domna: “Munaqeşeyan de çepgir û rastgirî tekperestîye de ameyî têhet. Tuncelî nameyê tekperestîye, Dêrsim zî sembolê demokrasî yo. Wexto ke Planê Islahatî yê Şerqî erzîya dewre, Dêrsim bi merkezê qetlîyaman. Nameyê ci zî na çarçewa de ame bedilnayene. Cok ra Tuncelî nameyê qetlîyamî yo.”
Nameyê Dêrsimî vîrê tarîxî yo
Tekînî dewamê qiseykerdişê xo de wina va: “Ma dêrsimijî nê zîhnîyetî qebul nêkenî û nêkerî zî. Dêrsim nameyê cografyayêka kulturele yo û bi seserran o ke no name esto. Hêrişo ke nê nameyî rê beno, raştîya xo de estene û erjanê ma rê beno. Dêrsimijî heta nika qet nameyê Tuncelî qebul nêkerdo. Wextêk Serekkomar Erdoganî nameyê Dêrsimî bikar ard û ozir waşt. Eke nameyê Dêrsimî bêro qebulkerdene, o wext do aştîya komelkî bêro awankerdene.”
MA / DÊRSIM