Endamê Komîteya Caardişî yê PKKyî Duran Kalkanî derheqê Endamê Komîteya Merkezî ya Partîya Komunaranê Şorişgeran Gokhan Taşyakan (Ulaş Adali) ke çend rojî verê Kobanê de şehîd kewtbî de qisey kerd û hîsê xo ardî ziwan.
Endamê Komîteya Caardişî yê PKKyî Duran Kalkanî va ‘şehadetê Taşyakanî seba demokratîkbîyayîşê Tirkîya vengdayîşêk o’ û wina dewam kerd: “Taşyakan hem endamê Heyetê Caardişî û hem zî dûştê fermandarîye de têkoşîn de ca girewtêne. Heta ke şehîd bî, wayîrê têkoşînêko biîstîkrar bî. Awanbîyayîşê rêxistina HBDHyî de rolê Ulaşî dîyarker o.
Kalkanî va ‘seba ke mi merdimêko winasî nas kerd, ez îftîxar kena’ û wina domna: “Xebatan de ma hemînan ra zafêr kede dayêne û mîyanê ma de yo tewr ciwan bî. Herçiqas ke ciwan bî, reyna zî ma hemînan ra hîna bi hawayo çareserkerdox nizdîyê probleman bîyêne. Vera probleman de zaf hesas bî. Seba ke embazanê xo nêşikno, zaf nazik û hesas têgêrayêne. Her tim xo perwerde kerdêne. Cuye û raştîya komelkî baş analîz kerdbî û xirabîya faşîzm, kapîtalîzm, mulko taybet û dewlete bi hawayo baş fam kerdbî.”
Ez Ulaşî ra zaf çî musaya
Kalkanî dîyar kerd ke ê her ke Ulaşî nas kerdêne, hîna zaf hêz û moral tira girewtêne û wina va: “Dîyalog û xebatê ci xeylê baş bî. Mîyanê xebatanê ma de qet ma zehmetîye nêant. Ulaş Adaliyî xoverdayîşê Gezîye de bi hawayo rêxistinker, îknaker û xeylê xusûsîyetanê xo yê bînan vera faşîzmê AKP û MHPyî de vindet. Reyna Ulaş vera DAIŞî de şerwan, mîlîtan û fermandarêko gird bî. Her tim ruh û cesaret dayêne û rêxistine kerdêne. Wexto ke karê zehmetinî ser milê ci de mendêne, qet xo eciz nêkerdêne. Ulaş bi hawayo şorişgêrêko gird hereket kerd û cuya. Hetta ke şorişgêrê winasî bibî, do şoriş bireso serkewtişî.”
Keda şorişgêranê Tirkîyaye
Kalkanî qala muhîmîya keda şorişgêranê Tirkîya yê 71 û 72î zî kerd û wina va: “Ulaş Bayraktaroglu, Azîz Guler û Destan Temmuze mîyanê nê şehîdan de yî. Nê kesê ke Xoverdayîşê Rojawanî de şehîd bîyî, şehîdanê 1971 û 1972î manenî. Senî ke xoverdayîşê serranê 70î muhîm bî, ewro xoverdayîşê Kobanê zî seba şorişgêr û sosyalîstanê Tirkîya xeylê muhîm o. Çimkî tîya de egîdanê kurdan şinasnenî û bi meymandarîya kurdan reyde têrî manenî. Ma zaf muhîmî danî nê kesê ke beşdarê nê xoverdayîşî benî. Ewro HBDH nêyî temsîl keno. Bi têkoşîn û şehadetanê winasîyan serkewtiş girîyeno binê temînatî.”
ANF/BEHDÎNAN