SERKAN DEMÎREL / ANF/CENEVRE
Taxê Lalebey û Alîpaşa yê qezaya Sûrî ya Amedî de û reyna Heskîfê Êlihî de zî rijnayîş dewam keno. Heto bîn ra dewlete heta nika 6 taxê bînî yê Sûrî zî bi temamî rijnaybî.
Babete ser o Awankerdoxanê Platformê Vera Rijnayîşê Sûrî de Nê ra Ercan Aybogayî qisey kerd û vera rijnayîşan de bêvengmendişê UNESCOye rexne kerd.
Aybogayî va ‘ma seba ke bale biancî çîyê ke Sûr û Heskîf de yenî cuyayîş ser, Ewropa de tayê xebatan kenî’ û wina dewam kerd: “Her di cayan de zî qirkerdişo kulturî û sosyal beno. Dewleta tirkî bitaybetî rijnayîşê Sûrî reyde hewl dana demografyaya herême bibedilna. Çîyê ke dewleta tirk kena çarçewaya sucê merdimîye de ya, labelê dinya vera nê kerdişan de bêveng a û no zî nîno qebulkerdiş.”
O wext çira şima estî?
Aybogayî dewamê qiseykerdişê xo de va ‘Heskîf 10 krîteranê UNESCO ra 9ê ci ano ca, labelê UNESCO Heskîfî nêpawena’ û wina domnaye: “Heskîf mîrasê dinya yo û cok ra dinya heme eleqeder keno. Heto bîn ra heta nika se ra 30-40ê Sûrî ameyo rijnayîş, labelê ti kes vengê xo nêvejeno. UNESCO Sûr de meşrûîyetê estena xo vînî kerde. Na dirîtî ya. Ma hende pêvînayîşî kerdî, rapor pêşkêşî înan kerd. Ma ra vatî ‘şima heqdar î, labelê ma nêwazenî Tirkîya reyde problemêko dîplomatîk bicuyî’. O wext çira şima estî?
Ganî ma vengê xo hîna zaf berz bikerî
Aybogayî wina va: “Seba ke UNESCO vengê xo nêkeno, ma zî do bêveng nêmanî. Eksê ci de ma do ser înan de zextan bikerî û têkoşîn bidî. Seba ke ma bişînbî çîyê ke Sûr û Heskîf de yenî cuyayîş, bi dinya bidî eşnawitiş, çi destê ma ra bêro, ma do bikerî. Eke ma nika nêkerî, ma do erey bimanî. Ganî ma xo vîra nêkerî; ma heqdar î û dûştê ma de hetêko ke suc keno esto. Ganî ma nêyî deşîfre bikerî. Ganî ma vengê xo hîna zaf berz bikerî.”