1ê Kanûne de Vakurê Sûrîye de Weçînayîşê Meclîsê Herême amebî viraştiş. Komîserîya Weçînayîşî ya Berze zî netîceyê fermî yê weçînayîşî aşkere kerd.
Netîce bajarê Amûdê ke girêdayeyê Kantonê Qamişlo de ya, bi îzehetêko nuştekî ame aşkerekerdiş. Îzehet hetê Hemserekê Komîserîya Weçînayîşî ya Berze Ruken Mele Îbrahîme û Îzeddîn Ferhanî ra bi kurdî û erebkî ame wendiş.
Îzehet de ame vatiş ke rêjeya beşdarbîyayîşî ya weçînayîşî se ra 69 ame aşkerekerdiş û îzehet wina dewam kerd: “Goreyê netîceyê weçînayîşan herêmanê Cizîr, Firat û Efrînî de lîsteya Piştîdayîşê Neteweyî yo Demokratîke bîye yewin.”
Şarî seba çareserîye şîyî sindoqan ser
Dewamê îzehetî de wina ame vatiş: “Şarê Vakurê Sûrîye seba ke şerê 7 serran bi hawayo demokratîk bêro çareserkerdiş beşdarê weçînayîşî bîyî. Merhaleyo dîyin yê weçînayîşan de seba weçînayîşê Meclîsê Herême 1ê Kanûne de weçînayîş ame viraştiş. Şar saetanê serê sibayî de şîyî ser sindoqan û reya xo dayî. Rojhelato Mîyanên û Sûrîye de reya sifteyîne ya ke weçînayîşêko azade û şefaf ame viraştiş.”
Netîceyê weçînayîşî wina yo:
Herêma Cizîrî:
Lîsteya Piştîdayîşî ya Neteweyîya Demokratîke: 2902 namzedan ra 2718ê ci ameyî weçînayîş. Lîsteya Koalîsyonê Neteweyî ya Kurdê Sûrîye 99 namzedan ra 40 kursîyî girewtî. 264 namzedanê xoseran ra zî 144î ameyî weçînayîş.
Herêma Firatî:
954 namzedanê Lîsteya Piştîdayîşî ya Neteweyîya Demokratîke ra 847ê ci kewtî Meclîs. 124 namzedanê Partîya Yewîya Demokratîke ya Kurdê Sûrîye (Wahde) ra 40 kesî ameyî weçînayîş.95 namzedanê xoseran ra 67 kesî weçînîyayî.
Herêma Efrînî:
1175 namzedanê Piştîdayîşî ya Neteweya Demokratîke ra 1056 namzedî ameyî weçînayîş. 197 namzedanê Wahde ra 72 namzedî ameyî weçînayîş. 48 namzedanê Îttîfaqê Neteweyî yê Sûrîye ra 8ê ci ameyî weçînayîş. 68 namzedanê xoseran ra zî 40 namzedî ameyî weçînayîş.
Peynîya îzehetî de herkesî rê sipasî ame kerdiş. Seba îtîrazkerdişê netîceyê weçînayîşan 3 rojê namzedan estî. Merhaleyo 3. yê weçînayîşî zî do çileye 2018î de bêro viraştiş.
ANF/AMÛDÊ