Bi nameyê Erîf Şêxoyî de kesêk, Rojawan de Rayberê Şarê Kurdî Abdullah Ocalanî dîyo û bîyo şahidê qiseykerdişê Ocalanî. Ocalanî qiseykerdişê xo de vato “Ez destanê şima birînanê şima ser nana ke şima birînanê xo tedawî bikerî û bibî wayîrê îrade. Ez zî sey şima bîya labelê mi aye cuye qebul nêkerd û ez kewta pey cuyêka newe.” ra zaf tesîr bîyo û ê qiseykerdişî xo vîr ra nêkeno.

MÎRAN EBDO/ROJ DENÎZ / ANF/ŞEHBA 

Rayberê Şarê Kurdî Abdullah Ocalan serra 1979î ra heta 1999î Sûrîye de mend û wexto ke Sûrîye de mend bi hezaran merdimî ey nas kerd, perwerdeyê ci ra derbaz bîyî û ey reyde hereket kerdî. Erîf Şêxo zî nînan ra yew o û eslê xo de efrînij o.

Şêxo o wext Tebqa de maneno û wexto ke yeno Efrîn hetê keyeyê xo, vîneno ke keye de meymanî estî. Şêxo wexto ke nê meymanan keyeyê xo yê PDKyî ra perseno, keyeyê ci tira vano ‘Nê embaz î’. Şêxo meymanan dir munaqeşe keno û o wext îdîa keno ke nê meymanî zî partîyanê komunîstî yê klasîkan ra ti ferqê înan çin o. Meymanan ra kesêk cewabêko winasî dano Şêxoyî: Nê, ma înan ra cîyayêr î. Ê kapîtalîzm şibênenî darêk û îdîa kenî ke eke dormeyê dare bêro kinitene, o wext kapîtalîzm wedarîyeno. Ma şorişgêr î, ma do şarî reyde kapîtalîzm werte ra wedarnî û ci birijnî. Ma xo seba nê şarî feda kerdo.”

No munaqeşe de netîceyêko vejîyeno werte û Şêxo qerarêko newe gêno. Şêxo serra 1983î de derbazê Helebî beno. Wexto ke ewja de xebetîyeno, saya embazê ci Caferê Reşo ke fealîyetanê partîye de xebetîyeno de, xebatan ra dûrî nêvindeno. 15ê Temmuza 1986î de beşdarê xebatan beno û heta 1990-91 dewam keno. Keyeyê ci ra zî tayê kesî beşdarê xebatan benî.

Şêxo 1990 de Ocalanî şinasneno

Şêxo grûbêka embazan reyde serra 1990î de şono hetê Ocalanî. Ocalan yeno û xîtabê 20 hezar ra zêde kesan keno. Ocalan ê qiseykerdişî de hîna zaf qala tarîxê Kurdan keno û kêmanîya kurdan ser o vindeno. Ocalan qiseykerdişê xo de qala çareserîya a rewşe zî keno. Şar Ocalan ra zaf tesîr beno û wexto qiseykerdişê ci qedîyeno, şar ver bi Ocalanî şono.

Şêxo dîyar keno ke Ocalanî ê qiseykerdişî de wina vato: “Welatperwerî bi no hewa nêbena. Ganî şima birêxistine bibî. Ma do qisey bikerî, munaqeşe bikerî û bixebetyî. Destê mi de zî sîleh çin o, labelê ez xebetîyena û wayîrê îrade ya. Problemanê xo çareser bikerê, dewa xo de, taxa xo de xo rêxistine bikerê û problemanê xo çareser bikerê. Bêxera şima ti kes azadî nêdano şima. Wexto ke ez ewil ameya tîya, çîyêkê mi çinêbi. Mi ziwan zî nêzanayêne, labelê ma tîya de Kurdîstanêk awan kerd.”

   

Êdî çîyêk sey verên nîyo

 

Şêxo û embazê ci şewêk ewja de manenî û dima ra agêrenî Heleb. Agêrayîş ra dima êdî yew zî sey verê nîyo. Heme wayîrê vînayîşêko newe yî û xebatê înan hîra bîyî. Heme zî seba ke hîna zaf bixebetyî û hîna zaf rêxistine bikerî, hewl danî. Şêxo û hîrê embazê ci, derbazê Lazkîye benî û şonî bano ke Ocalan tede maneno. Labelê Ocalan ewja de nîyo. Paweyê înan vindeto, labelê çîyêk bîyo û ewja ra şîyo. Banêko kehen o û ban de dolabêka cemedî ya şenike esta û aye xirabe ya. Cereyan çin o û boyaxê dêsan heme ameyo war. Şêxo û embazê ci ewil cereyanê banî virazenî, ban boyax kenî û ban pak kenî. Şêxo û embazê ci no ban de mendişê Ocalanî ra tesîr benî.

 

Ê qiseykerdişî xo vîr ra nêkeno

Şêxo dîyar keno ke Ocalanî Heleb de xeylê hetan dir kombîyayîşî viraştêne û dano zanayene ke o zî beşdarê ê kombîyayîşan ra yewe bîyo. Şêxo qiseykerdişê Ocalanî yê “Eke şima tîya ra şîyî, şima do vajî ‘Ma Rayberîye dî’. Ez tîya de destê şima birînanê şima ser nana ke şima birînanê xo tedawî bikerê. Labelê ganî şima zî xo bikerê wayîrê îrade. Mi şima ra nêva, ez rayberê şima ya. Şima wina va. Ez zî sey şima bîya. Ez lajê keyeyêko feqîr û citkarî bîya, labelê mi aye cuye qebul nêkerd. Ez kewta pey cuyêka newe. Çîyanê şenikan reyde eleqeder mebênê. Xo bêçare meverdênê. Xo bikerê wayîrê îrade ke wa dişmen şima reyde kay nêkero.” ra tesîr bîyo û dîyar keno ke o ê qiseykerdişî xo vîr ra nêkeno.