AHMET KANBAL / MA / ŞIRNEX
Bi zêdebîyayîşê vaya dovîzî xeylê çîyê bînî zî vaya înan zêdeya. Şeker, çay, cixara, tehîn, qehwe, rûn û tozê şitî ke Başûrê Kurdistanî ra ameyênê qezaya Silopî ya Şirnexî, zêdebîyayîşê dovîzî ver vaya înan zî zêde bîya. Mîyanê 3 aşmanê peyênan de vaya nê çîyan se ra 100 zêde bîya.
Çîyê ke vaya înan vejîyaya 2 qatî ra yew çay a. 3 aşmî verê vaya çayî mabênê 30 û 32 TL de bîye. Ewro vaya çayî vejîyaya mabênê 55 û 60 TLyî. Reyna vaya qehweyî zî xeylê zêde bîya. 3 aşmî verê vaya qehweyî 12 TL bîye, labelê ewro vejîyaya 20 TLyî. Tozê şitî verê cû dîyayêne 16 TLyî labelê ewro dîyeno 35 TL. Kesê ke kafe û qehwwexaneyê înan estî vaya çay û qehweyî se ra 50 zêdenayî.
Rûnê awin zî nê zêdebîyayîşan ra para xo girewto. 3 aşmî verê rûno 18 kîlo dîyayêne 80 TLyî, labelê ewro dîyeno 125 TL. Yeno vatene ke do vaya ci bivejîyo 135 TLyî. 10 Kîlo şeker verê cû dîyayêne 32 TLyî, labelê ewro dîyeno 40 TL. Çîyê ke vaya înan girêdayeyê dovîzî zêde bena, cixare yo. Cixaraya ke Başûrê Kurdîstanî ra yenî vaya înan se ra 100 zêde bîya. Cixaraya ke vere cû roşîyayêne 3 TLyî nika roşîyena 6 TL.
Birinc zî zaf zêde bîyo
Birinco ke Îran ra yeno zî vaya ci zêde bîya. 2 aşmî verê herême de 5 kîloyê birincî dîyayêne 32 TLyî, labelê ewro bîyo 55 TL. Marketan de ambargoya ke Amerîka ronaybî ver na vaye vejîyaya 65 TLyî. Tehînê Îraqî vere cû dîyayêne 40 TL, labelê ewro dîyeno 90 TL. Tayê cayan de zî dîyeno 100 TL.