Dewa Xerabê Bava ya qezaya Nisêbînî ya Mêrdînî de 15 rojî yo ke bin abluqaya dewlete de ya. Her roje tayê merdimê cîya cîyayî yenî tepiştiş, keyeyî yenî veşnayîş û îşkence zêde beno. Heyeto ke seba xebere girewtişî waşt ke şêro dewe hetê hêzê dewlete ra ame astengkerdiş. Babete ser o Endama Komeleya Psîkologê ke seba Piştîdayîşê Komelkî û Blokê Aştî Ebru Ergune qisey kerde.
Ergune va ‘vera nê wehşetî de bêvengmendiş yeno manaya şîrikîya wehşetî’ û qiseykerdişê xo wina domnaye: “Ez sey hetgirê aştî û psîkologêk tîya de ya. Îmkanê çapemenîye ser ro taqîpkerdişê hedîseyî çin o, cok ra ez ameya tîya. Tîya de tedayêka gird esta. Dewijî nêeşkenî sereyê xo keyeyanê xo ra bivejî. Domanê rewşêka winasî de benî pîl.”
Wa her kes veng bivejo
Ergune dewamê qiseykerdişê xo de vengdayîşê piştîdayîşî kerde û wina va: “Çîyo ke yeno kerdiş hetêk de beno sebebê piştîdayîşê yewbînan, labelê heto bîn de beno sebebê yewbînan ra cîyabîyayîşî. Cok ra ganî ma vera nêyî de bêveng nêmanî û seba ke ma vernîya cîyabîyayîşî bigirî, rayîrê cuyayîşo pîya bivînî. Eke ma çim û goşanê xo bigirî, reyna zî no wehşet yeno vernîya ma. Cok ra ma nêeşkenî vera nê wehşetî de bêveng bimanî. Ganî her kes na babete de hesas bibo û venb bivejo.”
ŞÛJIN / MÊRDÎN