Şîrketê Peykê Eutelsat ke merkezê ci Fransa de yo, ser waştenê RTUK a Tirkîye, seba padayîşê 3 qenalanê televîzyon yê Kurd reyna kewt hewldayenan mîyan. Hedefê Eutelsatî de nika zî Ronahî Tv, NewsChannel û Stêrk Tv estê. 

Eutelsat seba vindernayîşê weşana Ronahî Tv, NewsChannel û Stêrk Tv ferman dayo kargeha ûplînkê ya ke xîzmet dana nê qenalan. Eûtelsat verîya çend aşman zî netîceyê serpirodayîşê RTUK televîzyonê Kurdan Peykê Hotbîrd ra vet û bi metodanê bêhiqûqî weşana Newroz Tv û Med Nûçe Tv birna û vinderna. 

Desteya Rayverîn û gurekaranê Stêrk TV vizêr bi îzahatekê helwestê xo, bi raya pêroyîne ra pare kerdî. Îzahato ke bi lehçeyanê kurmancî, Soranî û Kirmanckî ame kerden de hayr ancîya bêhûqûqiya Eutelsatî ser. Emegdaranê televîzyonî veng dayî sazîyanê mîyannetewî, sendîka, sazîyê rojnamevanê sînornênasan û pêro sazîyê eleqederan ke verva qerarê bêhiqûqî yê Eutelsatî de înan tenya meverdê. Tewr peynî de zî îzahatî de vajîya ke zey emegdarê çapemenîya azad ê dê raya heqîqatî de xoverdayiş û tekoşîna xo biramnê. Îzahatê pêroyî yê Desteya Rayverîn Stêrk TV wina ya: 


Raya Pêroyîne rê;

“Dewleta Tirk bi wertaxîna Eutelsatî, wazena televîzyonê ma Stêrk û televîzyonanê Kurd Ronahî TV û News Chanel tarî bikero.

Eutelsatî 14'ê Nîsane 2017 de bi nûste saziya peyke rê rûsna û ferman da ke weşana televîzyona ma bêro birnayene. Verîya nayî zî Eutelsat, bê ke sebebê hiqûqî damûsno, weşananê Newroz TV û Med Nûçe TV birna be. Dawaya ke Mehkema Parîs de amêbî  akerdene, bi mehkûmiyetê bêhûqûqiya Eutelsatî netîce bî. Rixme nayê, Eutelsat reyna bînî bazarîyê xo yê qilêrîne bi dewleta tirk dana ramitene. Ma zey kedkar û gurekarê Stêrk TV, wazenê vajê, ma nê hewldayenanê tarîkerdişê raştîyan qebûl nêkenê.


Veng û riyê Kurdistanî

Serva naye ma zey televîzyono ke bi esasanê kaneşopîya resnayişê azadî ser o ame ronayene, bi vengdayişê "Raya Heqîqetê Ser o" kewta raye û dewam kenê. Dest ci kerdena weşane ra heta ewro gurenayişê ma,waştişê eşkerakerdişê raştîya Kurdistan, herême û dîna bî. Zey Stêrk TV bi helwesta netewî, ma waşt bibê veng û riyê Kurdistanî. Coka televîzyonêkê xeberan reyde, ma waşt bibê vengê çand û ziwanê şarê Kurdî ke  bin pençanê qirkerdişî de tekoşîna estbîyayene dano. Coka ma na helwesta hemverê televîzyonê xo, eynî wextî de zey hêrîşê hemverê kultur, ziwan û kamîya Şarê Kurdî vînenê.


Tirkîye rêza 155. de ya

Heto bîn ra, her kes zano ke no hêrîş hemverê heqê resnayişê raştîyan virajîno. Ma tecrubeyê verînan ra zanê ke, çi wext ke dewleta Tirk hêrîşê hemverê resnayişê azadî verhîra kerde, eynî wextî de dest bi pêla hêrîşanê hera kerdo. Coka mavênê serrekê de rejîmê Erdoganî 150 televîzyon, radîo û rojnameyê rojeyînî day padayiş. Herîşê ser rojnamevanan amey rewakerdiş û bi seyan rojnamevanî amey guretene. No hewldanê tarîkerdena raştîyan yê dewleta Tirk, kewt rojdeme dîna. Goreyê raporê sazîyanê rojnamevanê sînornênasan RSF yê serra 2017'ine, Tirkîye welatanê ke tewr zaf azadîyê resnayişî binling kena ya. Dewleta Tirk mavênê 180 welatan de rêza 155'ine de cayê xo guroto. 


Rejîmê Erdoganî wazeno vengê muxalîfan bibirno

Nika zî bi destdergîya qada mîyannetewî, rejîmê Erdoganî wazeno vengê muxalîfê ke mendê zî bibirno. Ganî bêro zanayene ke, ma kaneşopîya resnayişê azadî ra yenê ke, hemverê zext û herîşan teyna rayîreke est o, o zî xoverdayiş, tekoşîne û girsbiyayen  o. Ma dê destûr nêdê ke zalim û dismenê heqîqetî, astareyê Kurdan ke beriqîno bitefînê. Ma zey kedkarê Stêrk TV, veng danê pêro sazîyanê mîyannetewî sendîka, sazîyê rojnamevanê sînornênasan û pêro sazîyê eleqederan kenê ke verva nê qerarê bêhiqûqî ma teyna meverdê. Ma zanê ke şarê Kurd, dost û pêro rojnamevanê na rayirî, ê dê resnayişê azadî rê, vengê şaran, vengê îtîqatan, vengê kirmancî rê wayir bivejiyê. 

Ma bi xoverdayîşî dest pêkerd, ma bi tekoşîna heqîqetî pîl bî. Ma do raya heqîqetî ser o xoverdayiş û tekoşîna xo biramnê.”  


 BRUKSEL