Qenala televizyon ya sifteyîn ê Kurdan, 15ê Hezîran 1995î de bi nameyê MED TV destpa weşanê kerd.
Med TV, Medya TV, Roj TV, Nûçe TV takîp kerd. Û nika zî, qenalê zey Stêrk, Ronahî, Med Nûçe, Newroz û Çira TV, ser na mîras de weşan kenê.
Ozgur Gun TV zî, jû qenala ke, goreyê prensîbanê heqîqat weşan kena ya û hewl dana vengê Kurdan, bi ziwandê Kurdî biresno dinya. Qenala Ozgur Gun TV, 6ê Nîsane 2015 de destpa weşana satalaytê kerd. Ozgur Gun, verê cu bi nameyê Gun TV weşana herêmî kerdêne û weşana herêmî ya televîzyone hema zî dewam kena.
Vîzyonê Ozgur Gun TV
Televîzyona Ozgur Gun, ser Turksat 4A ra 24 seatan weşan kena. Ozgur Gun TV de beşê zey xeber, analîz, sîyaset, kultur, huner, muzîk, sînema ûsb. pêroyî de 36 programî yenî weşînayîş û ziwanê weşana Ozgur Gun TV se ra 80 Kurdî (Dimilkî û Kurmancî) yo. Ozgur Gun TV ke merkezê ci Amed o, bi taybetî xîtabê şarê Bakurê Kurdistanî kena. La qenal herzewbîn bi bernameyan ca dana rojdema Başûr û Rojawanê welat zî. Ancî Kurdî ke ça-kotî de cuyenî weşana Ozgur Gun TV ra hayêdar ê. Kes êşkeno-şeno vajo ke Ozgur Gun TV pê-bi pêrokîn programanê xo hewl dana bibo vengê pêrokîn şarê Kurd.
Rengîniya Gun TV
Weşana bi dimilkî 2010 de Gun TV de destpa kerd. Heta nika hem weşana herêmî û hem zî weşana satalayte de, bi-pê kirmanckî programî dewam kenî. 2010 de bi kirmanckî bernameyekê xeberan, mîyanê hewteyî de her roj, dest pêkerd. Dima ra programê bi nameyê Vîr û Vînayîş Gun TV de sey programêkê sîyaset, kultur û hunerî dest pêkerd.
2012 de zereyê hewteyî de her roje bi nameyê Neweyî xeberî ameyê weşînayiş. Ancî xeynî nê programan gorê demî programê taybetî zî ameyê viraştiş û weşanayîş. 2013 de zî programêko kulturî ke formatê ci gêrayîş bi, bi nameyê Rîyê Erdî dest pêkerd. Nê programî ke cor de ameyê vatiş heta destpêkerdişê weşana satalayte dewam kerdî û demê weşana newî ya satalayte de zî programê xeberan ke weşana herêmî de bi nameyê Neweyî ameyêne weşanayîş bi nameyêko bîn dewam kerd.
Weşana newî
Weşana newe de xeberê ke serwîsa dimilkî hadre kerd, pê programê ‘Bîyayîşê Roje’ mîyanê hewteyî de her roje ameyê weşanayîş. Destpêkê weşana satalayte de mîyanê hewteyî de, di rojî programê serê siba ke bi formatê wendişê manşetê rojnameyan weşîniya. Programê kulturî Rîyê Erdî, weşana satalayte de zî dewam keno û peynîya hewteyî de roja yewşeme saet 15:00 de yeno weşînayîş. Nika zî Ozgur Gun de serwîsêka kirmanckî esta û mîyanê hewteyî de her roje bi nameyê Bîyayîşê Roje bultenêka xeberan yena hadrekerdiş û goreyê seata Amed, seat 18:00 de yena weşînayiş.
Frekansa Ozgur Gun TV:
TURKSAT 4A
Frekans: 12303
Sembolrate: 27500
Polarîzasyon: Vertical
SERHILDAN ANDAN/AMED