LÊL AMED

Ez û çend embazê delegeyî, ma seba beşdarîya Kongreya HDPî ya Bi Heybet rê vejyayî rayîrî, ma mîyanê xo de krîtîk kerdinê, eceba goreyê mîsyonê HDPî kam hemserek bibî. Tay vanî do Tulay Hamlemîtoglu, Fîlîz Kerestîcîoglu, Huda Kaya, Besîme Konca, Osman Baydemîr, Ayhan Bîlgen, Velî Saçilik bibo, tay vanî do Sezaî Temellî dewam biko, qet nameyê Mîthat Sancar nêvîyareno la ma zanenî ke HDP partîyêka xîtabê heme şaran keno yo, do hemserek şaranê bindestî ra bivejê. Ma Bîrecîk vîyart, nêzdî Dîlokî otobusê ma vindert, ma vat ya cendirme ya zî polîs otobus vindarna la belê otobusê ma bî xirab.

Ramtoxê otobusê Dîlok gêra vat otobusê ma xîrab bîyo, otobusêk bierşawê la verperso negatif girewt. Peynî xeber ame ke do Amed ra otobusêk bêro. Teber serdo, Kurd kura bibo se adir û govend ra hes keno. Ma zî heme goreyê kerdişê verînanê xo adirêk veşna û dormera ci zî bi deyran govend girewt. Ma çend zazayî zî deyra Day vano, Day vano vat. Xo ra ma slogananê xo zî vîra nêkenê Wa Biciwo HDP ma qîrenê. Çend wesayîtêkê vîyartî bi qornayê xo ma silam kerdê. Ez zaf derg nêka, ma nêzdî 22 saetî de resayê Enqere. Min kelmelanê xo cayêk verada û heme bi lezî vîyarta banê Merkezê HDPî, qelebalixêk karî kerdinî estbî. Ez wazena kulis bika kam do hemserek bibê, min ra vanî ti henek kenî, qey ti nêzanenî Mîthat Sancar û Pervîn Buldan bibê hemserek. Uca ra yew embaz vat, Mîthat Sancar şarê Erebî ra yo, Sezaî Temellî seba ke Tirk o do goreyê min, partî ra tay dormera cîya bibê. Min vat qey, vat wina.

Ser siba saet: 08.00 de vîyarta cayê kongreye, merdim vano qey cayê Mehşerî yo, qelebalixêko bi heybet bi dawil û zirna kay kenê, cil û bergê xo yê xocayî kerdî ser xo û bê mîyanê sloganan qirenî. Kîtle ra taybetî cenîyî rayberî kenê. Şarê Enqere zî goreyê min hesretê coş û kelcaneyî, rewşêka bi şaşî û kêfweş beşdaran seyr kenî, belkî zî vanî eke nê HDPij nêbîynî şaredarîya ma do qet AKPî ra xilas nêbîynî. Kewtişê rojnamegeran ra min kewt salonu û taybetî pankartan elaqayê min antî. Mîsal ‘Tecrîdî ra nê’, ‘Ya kanal, Ya Stenbol’, ‘Demokrasîya xocayî ya bi qewet û rayberîya xocayî’, ‘Ma ciwan dest pê kerd, ma do bi ciwan biserkewê’, ‘Vera faşîzmê vard ser peya ameyox ti yî/a’, ‘Çareya faşîzmî cesaret a’ pankartî ke ameybî elaqnayiş, goreyê nasnameyê HDPî bibî.

Taybetî ez waşt şar, rojnemeger û perabesteyê tifaqe ra şîrove biga. Min Hetkarê Serekî yê KDP-Vakûrî Bora Balîn ra persa, kongreyêk do senî bibo goreyê şima, o zî vat: “Şima zî zanenê, şarê Kurd pêroyina Kurdistanî de cuyenê, rewşêka zext ra vîyarenê. Ma omid kenî xebata HDPî ya seba demokrasî û Kurdistan de têkoşînî bo azadî û destanîna heqê netewî her roj bi qewet bibo. Hêzê Kurdistanî têkoşînê xo yê pîroz bi tifaqe û bi yewrêzîye bixemelîyê. Bêşik netîceyê têkoşînê şaranê bindestî şerkewt o. Ma xebat û têkoşînê HDPî nêzd ra şopnenê û serkewtiş wazeno.”Min tikey dormera ewnîya û min rojnamegero duayen Huseyîn Aykol dîy û şîya hetê ci, persa şima senî nirxnenê û o zî wina vat: “Hîna bajarê dûrî ra şar nêameyî, nika ra qelebalixêk bi xurt esto. Ma fikrîyaynî ke Sezaî Temellî û Pervîn Buldan hemserek bibê la ma musa ke Mîthat Sancar do hemserek bibo. Seba ma erjîyeya xebere bedilya.” Min delegêko astengdar ra zî persa coşêk senî esto, vat; şar herikyeno, nika 50 hezar merdim ewta estê. Wekîlê HDPî Hasan Guneş, Hemserekê HDPê Amedî Zeyat Ceylan zî coş û kelcanê kongre ra bal antî.

Kongre bi coş dest pê kerd û zaf dorme ra mesajê serkewtişê ameyî û qerar zaf bi qiymet ameyî girewtiş.

Goreyê min na kongre omidê şarî şîn kerd. Nasnameyê HDPî ra newe ra ame balantiş, taybetî HDP ma vîra nêkî çiqas partîya Tirkîya bibo zî heto bîn partîya Kurdistanî yo zî. Eke HDP bi tifaqa netewî û şarê bindestanî ra israr biko do no welatî zî îdare biko. Ganî HDP do serra 2020î biko têkberdişê tecrîdî.

Çi heyfo ke Zekî Oguz seba beşdarîya kongre Sîîrt ra rayîr kewt la qelbê ci coş û kelacanê kongre nêhawana û cuya xo da. Zekî Oguz bî şehîdê Kongreya HDPî. Tewro peynî vaja ke çi bibo bila bibo, çiqas teda û zilm bibî zî bi partî, rêxistin û sewbî silgirê demokrasî şarê Kurd û bindestanî têkoşînê xo ra fek nêdanî û tifaqa xo do hîna bi aver benê.