Nîmeyê şewa verî ver bi Qereqolê Amutka yê Hozat 20 wesayîtanê zirxî ra vêşî leşker amey sewqkerdiş.
Xeylê mintiqayanê Dersim de wextêko derg do operasyonê leşkerî yenê ramiten. Operasyon her ke şino beno hera û weşîya rojane yê welatijan ser o tesîrêko pîl keno. Dewleta Tirk seba operasyono ke Xozat de rameno quwetê newî rusnay. Şewa verî saet 01.00 de vêşêrî 20 wesayîtê zirxî leşkerî sewqê Qereqolê Amutka ke dola (gelîye) Alîbogazi nîyadena, bî.
Hewteyo vîyarte de wexto ke leşkerî sewqê qereqolî kerdî, leşkeran daristanan (birr) day bî ver adir û daristanî veşnaybî û şewat vilayê hektarê hera yê mintiqa bibi.
Dersim de tenya jû aşma peyên de xeylê mintiqayan de şewatê daristanan vejya û xeylê daristan, hêga, deşt û dolî veşîyay. Seba tefênayenê şewatî û vernîgirewtişê vilabîyayîşê ci, ti tedbîrî nêamey girewtiş. Bi sebebê şewatî xeylê cinsê heywanan bî telef û xeylê darî û cinsê endemîkî çin bî?
Onluyî kirêşna meclîsî
Parlamenter Alîcan Onluyî babeta şewatê daristanî ke netîceyê operasyonanê leşkerî de vejyenê û ti tedbîr nîno girewtiş, kirêşt rojdemê meclîsî. Onluyî seba ke Wezîrê Karê Daristanî û Awe Veysel Eroglû cewab bido eve vernîyazpersêkî çend persan pers kerde. La heta nika seba vernîyazpersa Onluyî cewabek nêame dayen.
DERSIM