Çend aşmî yo ke dewleta Tirkî hêrişê Başûr û Rojawanê Kurdîstanî kena û hewl dana her di parçeyanê Kurdîstanî de dagîrkerîya xo awan bikera. Vera hêriş û dagîrkerîya dewleta Tirkî de her ke şono reaksîyonî zêde benî.
Na çarçewa de xeylê bajaranê Ewropa de çalakîyê şermizarkerdişî ameyî viraştene. Welatanê Ewropa ra Almanya, Fransa, Hollanda, Avûsturya, Yewnanîstan, Swêd û sewbîna xeylê cayan de kurdîstanî û dostê înan vejîyayî raşteyan, hêriş û dagîrkerîya dewleta Tirkî protesto kerdî.
Çalakîyan de siloganê ‘Wa bicuyo piştîdayîşyewbînano şorişgêrî’, ‘Terorîst Erdogan’, ‘Leşkerê Tirkan Kurdîstan ra bicehimê’, ‘Almanya destek dano, Erdogan bombe keno’, ‘Destanê xo Rojawan ra biancênê’ û sewbîna ameyî eştene. Çalakîyan de beyraqê PKK, KCK û posterê Rayberê Şarê Kurdî Abdullah Ocalanî ameyî akerdene. Seba ke hemwelatîyî bêrî zanakerdene, vilawekî ameyî vilakerdene.
Muxatab Birêz Ocalan o
Reyna çalakîyan de tecrîdo ke serê Rayberê Şarê Kurdî Abdullah Ocalanî de yeno domnayene, ame şermizarkerdene. Qiseykerdişê ke çalakîyan de ameyî kerdene de bale ancîya amancanê dewleta Tirkî ser û dagîrkerîya dewleta Tirkî bi ziwanêko wişk ame şermizarkerdene. Reyna çalakgêran dîyar kerd ke tena muxatabê çareserîye esto, o zî Birêz Ocalan o.
ANF/BRUKSEL