ŞEVÎN HESEN/ALVA OSÊ ANHA-HESEKÊ 3 aşmî ra zêde yo ke dewleta tirk û çeteyê ci hêrişê Efrînî kenî û netîceyê hêrişan de heta nika nizdîyê hezar sîvîlî ameyî kiştiş û hendêna zî birîndar bîyî. Reyna bi deshezaran efrînijî zî hêrişan ver mecbûr mendî ke cayê xo ra bivejyê û şêrî sewbîna cayan. Babete ser o sîyasetmedarê rojawanijî qisey kerdî û bale antî muhîmîya yewîya kurdan ser. Sîyasetmedaran dîyar kerd ke dewleta tirk û çeteyê ci hewl danî Sûrîye parçe bikerî. Sîyasetmedaran ra Endamê Partîya Yewîya Demokratîke ya Kurdê Sûrîye (Yekîtî) Xelef Biroyî va ‘Erdogan sere ra nata hewl dano Sûrîye de têmîyanî bivejo’ û wina domna. “Verê hetkarîya pere û sîlehî kerdî. Wexto dî ke çeteyê ci binkewenî, o bi xo hêrişê Efrînî kerd.” Biroyî bale ant hêriş û dagîrkerîya dewleta tirkî ke ver bi Başûrê Kurdistanî hîra benî ser û wina va: “Dewleta tirkî bi parçekerdişê Kurdistanî hewl dano mîyanê kurdan de pêrodayîşî kûr bikero. Badê ke dewleta tirkî Efrîn dagîr kerde, nika zî vera xo daya Başûrê Kurdistanî. Vera dagîrkerîye de ganî kurdî yewîya xo ya neteweyî awan bikerî.” Dewleta tirkî çeteyî bica kerdî Endamê Tevgerê Newebîyayîşî yê Kurdistanî Seed Xeloyî zî va ‘dewleta tirkî Sûrîye de selefîtîye dana ferzkerdiş’ û wina dewam kerd: “Meclîso ke bin beyraqa dewleta tirkî ya dagîrkere de awan bîyo, kurdan temsîl nêkeno. Cok ra ganî hêzê mîyanneteweyî ser dewleta tirkî de zextan bikerî ke wa dewleta tirkî Efrîn ra biancîyo û wa şarê Efrînî biagêro cayê xo.”