BÊRÎTAN HÊVÎ / JINNEWS
Têkoşînê cinîyê ke vera sîstemê camêrdê hakimî de danî, tena 40 serran reyde sînordar nîyo. Herçiqas ke tarîx qehremanîya înan nênuso zî, cinîyê kurdî wextê xo de serkewtiş û qehremanîyê girdan qezenç kerdî û cuya sosyale ra heta cuya sîyasale, kultur û hunerî ra heta zaf waran de serkewtişê girdî qezenç kerdî.
Nînan ra yewe zî Gulnaz Karataşe (Bêrîtan Hêvî) ya. Emser serrgêra 25. ya şehadetê fermandare Gulnaz Karataşe (Bêrîtan Hêvî) yo. Bêrîtane warê Xakurkê de heta guleyê xo yo pêyên, vera pêşmergeyanê PDKyî de şer kena. Serra 1992î donemêko tewr zaf tede îxanet û hemkarîya kurdan aver şonî yo. Bêrîtane hertim vera îxanet û nîjadperestîye de nefretêko zaf gird zerrîya xo de kom kena. Ya do zorê înan biberdêne û înan tepîya bidayêne, yan zî do teslîm nêbîyêne.
Bêrîtane teslîm nebîye… Bêrîtane bi xoverdayîşê xo yo tarîxî û bi qehremanîya xo ruhê teslîmnêbîyayîşî awan kerde û bi no hawa şexsê xo de ruhê 25ê Teşrîna verêne awan kerde. Herçiqas ke pêşmergeyanê PDKyî veng dayêne û Bêrîtane ra vatêne ‘Teslîm bibe, ma do çîyêk bi to nêkerî. Ma zî kurd î’ labelê Bêrîtane vera nînan de va ‘ez teslîmê kehenperestîya kurdan nêbena’ û dima ra bi tîlîlîye xo zinaran ra eşte war. Bêrîtane bi nê vindetişê xo bîye awankarê xeta azadîye. Çekûyê ke tewr weş qala Bêrîtane kenî û nîşan danî ke vera teslîmîyetî de sere nêronena, reyna hetê aye ra ameyî nuştiş. Bêrîtane wina nuşta: “Şer bike gula mi, xo bişidêne. Çimkî ma bi şerkerdişî estî. Ma bi şerkerdiş rind benî, zêde benî û ma bi şerkerdişî hes kenî. Ez seba ke bida dişmeno ke hêvî, roje û adirî ra terseno ro şona.” Bêrîtane nê nuşteyê xo de nîşan daya ke aye sîmgeya xoverdayîşî ya.
Ez teslîm nêbena...
Bêrîtane PKK de demêko derg karê çapemenîye reyde mijul bena, dima ra nêwazena na xebate de ca bigîra. Bêrîtane wazena warê şerî de ca bigîra. Herçiqas ke aye ra yeno waştiş ke wa cepheyê apey de bivindero zî, Bêrîtane vera hêrişê ke Başûrê Kurdistanî de dest pêkenî de cepheyê tewr vernî de şer kena. Hîkayeya Bêrîtane bi kameraya Halîl Dagî erzîyena pratîk, yewa yewe ê vîstê ke ameyî eşnawitiş, yenî vera şarê kurdî. Wexto ke fîlm ame weşênayîş, ez salon de bîya û mi dî ke aye salone de ti kesî nêşênaybî hakimê hesiranê xo bibî. Dima ra cinîyê ke salone de bî, bi tilîlîyan piştî daybî tilîlîya Bêrîtane. Aye salone de çîyo ke mezgê herkesî de mend, cewabo ke Bêrîtane daybî îxanetkaran bî. Bêrîtane vera kesê ke mîyanê îxanetî de bîyî rê wina vatbî: “Şima dişmenî reyde ortaxî kerd, şima Başûr ra hêrişê şorişê Vakurî kenî, şima xayîn î, ez teslîmê şima nêbena.”