Partîya Karkerên Kurdistan PKK ke 27ê Mijdare 1978î de dewa Fîs yê Licê de ronîya 38 serrî pey xo de terna. Verîya ronayişî zî nezdîye 6-7 serrî xebatê koma Apocîyan amey ramiten. Bi nayî kes şeno vajo ke PKK nezdîye nîm se serrîya xo beno. Nê serran mîyan de PKK hetê neteweyî, civakî, hetê azadîya cenîyan de gamê zey şoreşî eşt û aveyşîyayişeke gird rona. Dûştê quwetanê îşgalkarîn de zî ispat kerd ke endî PKK Kurdistan û Rojhelatê Mîyanî de quweteke esasî ya. Roja ewroyî de PKK endî tenya jû partî nîya û xo çarna sîstem û felsefeyekê. 

PKK seba şarê Kurd çi îfade kena, Kurdistan ard kamcî qonaxî, yew cenî, yew ciwan û yew camêrdekê  welatperwer yê Kurd ra pers kerd. 

6 kesan ra resya mîlyonan kesan

Cenîya Kurd ya welatperwer Ayşe Marangoz ke xêlê şehîdê ci tekoşîne serbestî de estê da zonayen ke roja ronayişê PKK ra na het zerreyê tekoşîne serbestî de ca gênê. Marangoz vist vîrî ke PKK ya ke hetê 6 kesan ronîya, ewro bi mîlyonî kesî dima ra şinê û felsefeyê ci pêrokîn dinya de vila bi.  

Marangoz hayr ancena polîtîkayanê îşgalkarî yê quwetanê serdest ser û wina vana: “Welatê ma Kurdistan ke kerdî çehar parçe, nika bi saya PKK beno jew. Netewbîyena Kurdan virazîyena. No bi saya keyna û xortanê Kurdan de beno.”

Kurdistan do ronîyo

Ser persa ‘sebebê qedexeyê PKK yê Almanya çiçîyo?’ de zî Ayşe Marangoz wina cewab da: “Wa Almanya, Awrûpa û Amerîka xo ra bişermê. Çima hona zî PKK qedexe kenê? Gerek PKK serbest bikerê. Çike PKK şar bi xo yo. Qedexeyê PKK yeno maneya qedexekerdişê şarê Kurd bi xo. PKK seba welatê xo, seba însanîyetî, têdûştê, seba heqî û azadîya cenîyan tekoşîn keno. Bi saya PKK cenî bî serbest. Qaîdeyê PKK qaîdeyê cenîyan o. Seba ke menfeatê Almanya, Awrûpa û Amerîka bi Tirkîye estê eno qedexeyê vera PKK nêwedarnenê. Eke nê quwetan desteg nêdaybîya Erdoganî, do Erdoganî nêşîyabi Kurdan hendayî qir bikero.”

Marangoz veng da dewleta Almanya ke hinî no qerarê xo bivûrno û hemverê Kurdan gamê newî çekero û va: “Ê sekenê wa bikerê Kurdistan do ronîyo. Zey şarê Kurd ma heta peynî pey PKK û gerîlayanê xo de yê. 2017 do bibo serra serkewtişê PKK û Kurdistan.“ 

Her çî înkar bibi “Ez esta, heqê mi esto“

Welatperwerê Kurd û pîyê yew gerîla Mehmet Emîn Yildizî zî vist vîrî ke ‘verîya PKK welatê kurdan, zonê ci, kulturê ci, şexsîyetê ci, hardê ci her çîye ci înkar bibi’ û aşkere kerd ke ‘PKK vera qirkerdiş û na înkarî de yew qerar, yew hemle bi.’ Yildizî da zonayen ke bi nameyê Kurdatî de her çî înkar bibi û wina va: “Kurd kamîya xo ra kewtbi dûr. Hinî ne nameyê Kurdistan ne zî yê Kurdan amebi vatiş. PKK dûştê na înkarî zey qerarê xoservetiş ronîya. Bi PKK ame vatiş ke “Ez esta, heqê mi esto“. 

Yildizî da zonayen ke wexto ke herkesî tersa vajo ke „ez Kurda“ ra ameynîya na merhale û hina dewam kerd: “Nika PKK û kurdî pêrokîn dinya de bî vila. Sînorê ke Kurdistan kerdî çar lete darîye we. Her ca de dûştê dişmenanê xo, dûştê îşgalkaran de şer keno. PKK him Kurdan weriştna payan, him zî Kurdan kerd yewe. Kurd û Kurdistaneke xoser rona. PKK yew qonax girewt û yew  dewraneke newî kerd a. 

PKK bî rehberê şaranê bindest  

Yildizî ard ziwan ke roja ewroyî de PKK zaf nezdîye azadî bîyo û vist vîrî ke PKK nika xo kerdo yew sîstemekê alternatîf. Yildizî dîyar kerd ke cewherê no sîstemî de cenî, ciwan û însan esto. Sîstemekê xoser û azad o. Dûştê modernîteya kapîtalîzmî de sîstemeke konumal û konfederal o.

Yildizî aşkere kerd ke Kurdê ke welatê xo ra abiryay, Asya ra heta Amerîka, Awrûpa ra heta Afrîka her ca de bi saya PKK wayîrê kamîya xo, ziwanê xo û wayîrê xo vejyenê û qiseyanê xo hina domna: “Kurdan xo kerdî rêxistin û dormeyê PKK girotî. Cok ra endî PKK bîya malê şarî. Bedelê nayî zî zaf giran bi. Sey ke bi sereyê derzî yew bîr kinite. Nezdîye 50 hezar şehîdî amey dayiş. Nayî ra ma êşkenê vajê ke PKK partîya şehîdan a. Nayî ra qîymetê PKK zaf pîl o. Çike bi gonîya şehîdan ronîyaya. Nayî ra ma vanê heta ke no dinya de yew Kurd biciwîyo do PKK zî bibo.  Yildizî da zonayen ke PKK tenya partîya Kurdan nê, partîya pêrokîn şaranê bindestan a. Pêronan rê bî yew rehber.  


Partîya gencan a

Cenîya genc ya 15 serrî Sarya Ataç zî aşkere kerd ke PKK partîya gencan a û vist vîrî ke serragêra ronayişê PKK rojeke zaf muhîm a. Ataş ard ziwan ke PKK bi fikir û felsefeyê xo, bi tekoşîn û emegê girdî  Kurdistan roşn kerd, çimê Kurdan akerd. Cenîya genc Sarya Ataç dîyar kerd ke bi saya PKK Kurdî bî zane û qedrê azadî hona rind zanê. Sarya vana rîwalê na raştî ma heta peynî pey PKK de yêû  heta serkewtişî bayreqa PKK berz bikerê.”

Sarya ke nêrazîbîyayiş ‘qedexeyê’ PKK yê Almanya rê damûsna va ma no qerarî qebûl nêkenê û waşt ke no qerarê nêheq ca de wedarîyo. 


OMEDYA WELAT