Hemşaredara qezaya Wan Bêgir Safûre Guneş vist vîrî ke bi serrano vera şîdetî tekoşîn danê. Guneş da zonayen ke tewr vêşêr zî cenî û domanî benê qurbanê şîdetî û va, ‘Emserr zî rîwalê polîtîkayanê hikûmet şîdet hona bî berz. Guneş zey nimûme zî rehîn girotişê îradeyê cenîyan weçîntoxan damûsna û wina va: “Çîyo ke cenîyan temsîl kerd çi estbi raştê hêrişanê giran ame. Ajansa Jinha ke vengê cenîyan bî amê girotiş. Çi qe ke cenî benê zane û heqanê xo musnenê hêrişê vera cenîyan zî hendayî beno berz.
Bin tîvarîye de ’Qanûna şîdetî’ vetî
Safûre Guneş vist vîrî ke bin pêşnûmeyê qanûna tîvarîye de qanûnê ke vetî qanûnê şîdetî bî û va, ‘na qanûn zî ser ma ferz kenê.’ Guneş veng da cenîyan ke 25ê Mijdarî de vera şîdetê camêrd û dewletî de vinderê û va, “Seba civakeke zane ganî her kes şîdetî rê vajo ‘Vindere’”.
Cenîyan ra Dewlethan Aslan zî da zonayen ke camêrd dewlet ra quwet gêno û şîdet rameno. Aslan vist vîrî ke zihnîyetê camêrdan se serrano bi nêweşîya şîdetî xo rafîneno werte. Aslan aşkere kerd ke camêrd şîdeta ke vera cenîyan rameno zey marîfetî vîneno û va, ‘Ganî şîdet bîro munaqeşekerdiş. Ganî dûştê şîdetî de werzime ser payan. Roja maya ewroyî de şîdet endî vejya teberê keyeyî, teberî de açarnîya şîdetê polîsan. Wazîyeno ke cenî bi şîdetî bikerîyo kole. Ewro zî cenîye ke dûştê şîdetî vejyenê kuçeyan erdî ra yenê kaşkerdiş.
Xopawitiş şert o
Aslan ard zon ke ganî vera şîdetî xopawitiş bîro aveyberdiş û aşkere kerd ke vera şîdetî xopawitiş heq o. Aslan dîyar kerd ke ganî 25ê Mijdarî de cenî vera şîdetî vengê xo berz bikerê.
Cenîyan ra Neharî Akbûlût ke şîdetî rê va ‘bes o’ zî aşkere kerd ke vera şîdetî wextê serewedarnayişî ameyo. Akbûlût veng da cenîyan ke 25ê Mijdarî de heyatî vindarnê.
JINHA / WAN