ERSÎN ÇAKSU / ANF / KOBANÊ
Xelatê ‘Festîvala Fîlman a Kobanê ya Mîyanneteweyîye’ ke hetê Komunê Fîlmî yê Rojawanî ra amebî organîzekerdene, dîyayî wayîranê xo. 400 ra vêşêr fîlm, fîlmo kilm, anîmasyon, belgefîlm û belgefîlmê kilmî ê welatanê cîyayan ê dinya ra û çar perçeyanê Kurdistanî ra festîvale rê muracat kerd.
Alberto Garcîa ke Komunê Fîlmî yê Rojawanî de ca gêno û pîyê ci zî wextê şorişê Kuba de endamê heyetê Akademîya Sînema ya Kuba bi, qisey kerd. Garcîayî va ‘Kobanê de virazîyayîşê na festîvale manîdar o, no şaristan bibi destpêkê vîndîkerdişê DAIŞî’ û wina domna: “Rîyê ambargoyê hemverê Rojawan û Vakurê Sûrîye ra xusûsen rîyê problemanê ke Başûrê Kurdistanî de yenê ciwîyayene ra xeylî jurî û dîrektorê ma nêeşkayî tewrê festîvale bibê.”
Garcîayî qala raştîya sînema kerde û wina va: “Ez seba bîyayîşê xo yê tîyayî zaf kêfweş a. Ez zî ewro Rojawan de seba hewilnayîşê kulturî yê mabênê Rojawan, Îspanya û welatanê bînan mîyanê na xebate de ca gêna. Amancê mi o bi ke ma nîşan bidî ke sînema elîtîst nîya, hîkayeyanê şaranê cîyayan neqlê yewbînan kena.”
Se ra 60ê fîlman yê cinîyan bî
Safînaz Evdiko ke endamêka bîne ya komîteya hadreyîya Festîvala Fîlman a Kobanê ya Mîyanneteweyîye bîye, va ‘fîlmê ke festîvale rê ameyî şirawitene înan ra se ra şeştî ra vêşêr fîlmê cinîyan bî’ û wina domnaye: “Fîlmê ke dîrektorê înan cinîyî bî, zî vêşî bî. Na festîvale ma rê bîye tecrubeyêko gird.”