Kedkarê ke bi Qerarnameyê Hukmê Qanûnî (KHK) karî ra ameyî îxraçkerdiş, bi taybetî badê sîstemê 4+4+4î, ferzkerdişê dersê mecbûrî, ‘yew ziwan’, ‘yew milet’ û ‘yew beyraqe’ de bireaksîyon î.Babete ser o kedkaranê perwerdeyî ra Songul Tunçdemîre û Sema Uçare qisey kerdî.
Tunçdemîre va ‘ez seba ke elewî bîya, ameya îxraçkerdiş’ û wina dewam kerde: “Ez hetgirê perwerdeyêko laîk, demokratîk û bi ziwanê dayîke ya. Bi sîstemê 4+4+4î sîstemê perwerdeyî xira kerd û bi temamî kerdo dînî. Mektebî nika açarîyayî îmam xatîban. Nika seba wendekar û welîyanê wendekaran dersî ameyî ferzkerdiş. Elewî û ateîstî mecbûr mendî ke nê dersan bigîrî. Ez seba ke vera înan de vejîyaya, ameya îxraçkerdiş. Ma ferzkerdişê yew dînî qebul nêkenî.” Tunçdemîre qiseykerdişê xo de va ‘sîstem ser zîhnîyetê tekperestî ser ro polîtîkayanê xo meşneno’ û wina domnaye: “Ez wazena bitaybetî ser yew miletî de bivindera. Wazenî Kurdistan de bi zorî heskerdişê beyraqe bidî awankerdiş. Na raştîya Tirkîya ya. Yê ke tewr zaf ferzkerdişê yew miletî ra tesîr benî kurd î. Bi serran o hende zulm vînayî ke keyeyê înan rijîyayî, veşayî û cenazeyê înan bi rojan dolaban de ameyî vindarnayîş. Reyna bi zorî beyraqe bi înan dîya xoradayîş û ame vatiş ke ‘ya do şima bimirî, yan zî şima do na beyraqe ra hes bikerî.”
Ma qebul nêkerd
Uçara ke 15 serran mamostatî kerde û 7ê sibate de ameye îxraçkerdiş zî dîyar kerde ke tekperestî polîtîkaya hukmatî ya û wina va: “Ma sey mamostayê Egîtîm-Senî seba ke tekperestî qebul nêkerd, ameyî îxraçkerdiş. Tekperestî sifteyîn domanan ra dest pêkena; domanî emrêko şenik de yenî asîmîlekerdiş. Nika ma ameyî îxraçkerdiş û keso ke mudaxaleyê nînan bikero zî nêmend. Wazenî neslêko ke bîatê înan bikero, biresnî. Bitaybetî dûştê verdibistanî ra dest pêkenî û hewl danî kesê ke îtîraz nêkerî biresnî.”
ŞÛJIN/STENBOL